Ballon d'Or thlan dan hi a fuh chiah em?

Dutch player ropui Johan Cruyff chuan December thla khan Ballon d'Or chungchanga a ngaihdan a lo tarlang tawh a, ngaihtuah a ti thui hle. Cryuff chuan, "Mimal takin Ballon d'Or hi ka ngaihven peih lo. Media intihhlimna hmunah ka ngai, tupawhin an thiam tih thlang loin an ṭhian hnai an thlang. Tu pawh tling se kan pawm thiam a ṭul, ngaihven loh law law hi a finthlak zawk," tiin a lo sawi tawh.

Engtin nge an thlan?

FIFA hnuaia ram inziaklut coach leh captain bakah journalist thlan bik te'n player pathum ṭheuh an thlang thei a; an thlan hmasak berin point nga an hmu a, pahnihnain point thum an hmu a, pathumnain point khat an hmu ve bawk.

Sawisel theih?

An vote dan ṭhenkhat a ding lama tarlan hi ngun takin chhiar la, Ajax leh Barcelona legend Cryuff-a sawi hi a dik thawkhat tih i hre thei ang.

Spain captain Iker Casillas hi Ronaldo nena Real Madrid tana khel dun an ni a - Ronaldo, Sergio Ramos leh Thomas Muller te a thlang. An elpui Lionel Messi tan hmun a awm lo.

Chutiang chiahin Spain boss Vicente del Bosque hi Real Madrid enkawl tawhtu a ni. Del Bosque-a mi thlante chu Cristiano Ronaldo, Philipp Lahm leh Serigo Ramos te an ni a, Catalan club tan hmun a awm lo. Spain captain hi Carles Puyol ni ta se an player thlan hi a dang thei, coach hi Pep Guardiola ni se Catalan player tan hmun a awm a rinawm. Spain aiawh journalist Alfredo Relano erawhin duhsak a nei lo niin a lang - Cristiano Ronaldo, Manuel Neuer leh Lionel Messi te a thlang.

Portugal coach Fernando Santos leh journalist Rita Joaquim te'n Ronaldo an thlang ve ve a, player pathum an thlan zingah Messi a lang lo.

Argentina coach Martino Gerardo-a'n Messi bakah Argentine player Angel Di Maria leh Javier Mascherano-te a thlang. Argentine journalist Enrique Sacco-a'n Messi a thlang hmasa ber a, Portuguese journalist ang lo takin an ram player elpui Ronaldo a thlang thung.

Mahni inthlan theih a ni lo a, Ronaldo-a'n Real Madrid tana a khelh pui Ramos, Gareth Bale leh Karim Benzema te a thlang a; Messi-a'n a khingpui Ronaldo a thlang duh bik lo - Angel di Maria, Andres Iniesta leh Javier Mascherano-te a thlang.

Germany pawhin an duhsak zawng tho an vote - Coach, captain leh journalist te'n German player vek an thlang. US manager German pa Jurgen Klinsmann pawhin Manuel Neuer thiam a ti ber. Heta ṭanga lang chiang nghal deuh chu vote thlaktute hian thiam tih zawng rau rauah an duhsak zawng an thlang tih hi a ni.

Ngaihnawm

England manager Roy Hodgson-a'n award dawng thei tura langsar Cristiano Ronaldo leh Lionel Messi te a thlang lo. A player thiam tih ber chu Javier Mascherano a ni daih! He Argentine midfielder thiam ber titu dang awm chhun chu Belarus coach Andrei Zygmantovich a ni.

England captain Wayne Rooney-a'n Manchester United-a a khelhpui ṭhin Ronaldo thiam a ti ber. United captain hian Messi aiin Toni Kroos leh Gareth Bale a la thlang zawk cheu bawk.

Vote aṭanga thlirin Portuguese forward Ronaldo hian 2015 Ballon d'Or dawngtu nih hi a phu a, vote a hmu sang lawr lak. United Kingdom-ah Ronaldo hian 42% vote a hmu a, Gareth Bale pawhin 16% lai a hmu pha - Bale-te ram Wales hi United Kingdom chhunga awm a ni.

Europe ramte'n Ronaldo bawk an thlang a, Real Madrid forward hian 40% vote a hmu a; Manuel Neuer-a'n 21% vote hmuin Ronaldo hnuai chiahah a awm. South America ramte pawhin Ronaldo tho an thlang a, amaherawhchu South America-ah chuan Ronaldo hian 31% vote chiah a hmu a, amah hnaih bertu Messi (16%) ai chuan vote hmu sang tak a la ni tho.

World Cup final-a Germany chakna goal khungtu Mario Gotze chu Caribbean Island St Lucia-ah lamin an ngaisang khawp mai - captain, coach leh journalist-te'n pakhatnaah an thlang vek.

India kan bang lo

India captain Sunil Chhetri-a'n Gemany keeper Manuel Neuer a thlang a, pahnihnaah Thomas Muller thlangin pathumnaah Ronaldo a lang hram.

Coach Savio Medeira-a'n Chhetri ang thoin Messi a thlang tel lo. India coach hian Ronaldo a dah hmasa ber a, Neuer leh Muller-te a thlang tel bawk.

India aiawha journalist thlan chhuah chu Hindustan Times sports writer Dhiman Sarkar a ni. Sarkar hian Thomas Muller, Phillip Lahm leh Manuel Neuer-te a thlang.

A ropui tho e

FIFA hi khawvela football thuneitu sang ber a ni a, player ṭha ber hnena an hlan Ballon d'Or Award hi eng ang pawhin sawisel se a thlangtu thuneihna a san em avangin a ropui tho.

Ronaldo hian kum 2014 chhung khan ram leh club tan goal 61 a khung a, assist vawi 22 lai a nei bawk. Real Madrid forward mimal record hi a ropui a, World Cup-ah Portugal thlen sanpui lo mah se Ronaldo hian Real Madrid chu Copa del Rey, UEFA Champions League, UEFA Super Cup leh FIFA Club World Cup-ah a champion pui. Record hi thlir vang vang la - Ronaldo hian chawimawi hi a phû.