Number hmanga Cricket World Cup thlirlawkna

February 14 aṭangin ICC Cricket World Cup 2015 chu Australia leh New Zealand-ah khelh ṭan a ni ang. Ram 14 telna inelnaah hian inkhel 49 a awm dawn a, ram 14 te chu group hnihah pasarih ve ve ṭhen hrang niin a ang pali ve vein quarterfinal an lut dawn a ni.

Group A-ah a thlengtu Australia leh New Zealand bakah England, Sri Lanka, Bangladesh, Afghanistan leh Scotland te an awm a. Group B-ah champion lai India bakah South Africa, Pakistan, West Indies, Zimbabwe, Ireland leh United Arab Emirates te an awm thung.

210 - Inelnaa tel tur player zat.

43 - United Arab Emirates vice-captain Khurram Khan hi June 21, 1971 khan a piang a, kum 43-a upa a ni tawh. Player upa erawh Khurram Khan a teammate leh captain Mohammad Tauqir a ni a, UAE captain hian January 14 khan kum 43 a tling.

18 - Afghanistan player Usman Ghani chu kum 18 chauh a upa a ni a, tun inelnaa naupang ber a ni. Ghani hi November 20, 1996 khan a piang. World Cup inelna hrim hrima naupang ber chu Canada player Nitish Kumar a ni. 2011 World Cup khan Nitish hian kum 16 chauha upa ni chungin World Cup-ah a inlan.

33 - Player tawnhriat ngah ber chu Sri Lanka veteran player Mahela Jayawardene a ni. Sri Lanka batsman hian 1999, 2003, 2007 leh 2011 World Cup-ah te khan inlan tawhin match 33 a khel tawh a ni.

5 - 2015 World Cup khel tur zingah player panga te chu an ram champion-na kawnga inlan tawh an ni. 2011-a India champion ṭumin MS Dhoni, Virat Kohli leh Suresh Raina te an tel a, 2007-a Australia champion ṭumin Michael Clarke leh Shane Watson te an tel bawk. Tun World Cup-a kan hmuh tur Indian Ravichandran Ashwin bakah Australian Mitchell Johnson leh Brad Haddin te hi champion team squad-ah chuan an tel tawh a, mah se field chhungah an inlan ve lo.

991 - Kumar Sangakkara-a'n Sri Lanka tan World Cup (2003, 2007, 2011)-ah 991 runs a siam tawh. 2015 World Cup khel tur zinga World Cup-a run siam tam ber a ni.

83.63 - Australia captain Michael Clarke record pawh hi a ropui khawp mai. Ṭum 15 a luh tawhah 669 runs a siam a, a average chu 93.57 a ni. 2015 World Cup khel tur zinga average nei ṭha ber a ni a, a pum pui ang pawha pathumna ni phak a ni. Clarke dawta average nei ṭha leh chu Australia player tho Shane Watson a ni. Watson hian vawi 12 a khel tawh a, a average chu 62.14 a ni.

31 - Sri Lankan bowler Lasith Malinga-a'n World Cup match 15 a khelh tawhah wicket 31 a la tawh. Kumin World Cup khel tur zinga wicket la hnem ber a ni.

2 - Ram pakhat aia tama World Cup-a inlan tawh player pahnih an awm. Ed Joyce-a'n kum 2007 khan England tan inlan a, 2015-ah hian kum 2011-a a khelhna Ireland tan bawk a inlan ang. England captain tur Eoin Morgan hian kum 2011 khan England tan a khel tawh a, 2007-ah Ireland tan a lo inlan tawh bawk.

14 - Khawpui 14-ah World Cup match 49 hi khelh a ni ang.

1 - Champion pakhat chiah an awm dawn. March 29, 2015-ah Melbourne Cricket Ground-ah engkim a chiang ang.