Everton hnehin West Ham an tlang

FA Cup third round replay-ah West Ham United leh Everton te'n inkhel hmuhnawm an lantir a, hun pangngaiah goal khat ve ve an khung hnuah extra time-ah hetiang zat bawk hi an khung leh a. Penalty shootout-ah goalkeeper Adrian-a goal hmangin mualneitu West Ham 9-8 in an chak.

Thawhlehni zan inkhelah first half-ah goal a lut lo. Second half-ah Enner Valencia chuan Andy Carroll pass chu goal-ah a chantir a, minute 51-naah West Ham 1-0 in hma an hruai. Everton-in goal an chhuah hnuah Aiden McGeady-a'n yellow card vawi hnihna a hmuh avangin hnawhchhuah a ni a, mikhual team dinhmun a ṭha lo lehzual.

Minute 81-naah substitute Kevin Mirallas-a'n freekick aṭangin kawh zetin a khung a, keeper Adrian dem theih a ni lo. West Ham-in nawr chhunzawm mah se Toffees keeper Joel Robles a che ṭha a, Mark Noble leh substitute Kevin Nolan te a tih beidawn zarah hun pangngaiah 1-1 a ni.

Extra time khelh a ṭul a, player 10-a khel Everton-in minute 97-naah Romelu Lukaku hmangin hma an hruai a, Belgium forward hian Mirallas thawhṭhat rah a seng. Lukaku hian a ṭhianpa Belgium Under-21 international player Junior Malanda hriat reng nan van lam a kawk - Wolfsburg midfielder Malanda hian Pathianni khan car accident vangin a nunna a chan a ni.

Everton tan Mirallas a che ṭha chhunzawm a, Belgium winger hian penalty hlawhchhuak turah a inngai a, referee ngaihdan a dang thung. Inkhel a ngaihnawm zel a, minute 111-naah West Ham boss Sam Allardyce-a'n James Collins aiah Carlton Cole an luh tir a, minute hnih hnuah Cole hian goal a khung nghal a. Extra time zawhah 2-2 a ni.

Penalty shootout-ah Everton forward Steven Naismith penalty chu keeper Adrian-a'n a dan hnuah Stewart Downing-a'n chakna goal khung theihna hun ṭha nei mah se Everton keeper Robles-a'n a dan sak.

Robles-a'n hero ni thei turin a pen chhuak a, kawh takin crossbar a pet per a, a goal lo. Hei hi West Ham keeper Adrian tan hun ṭha a ni a, cool takin chakna goal a khung.

Everton-in an match hnuhnung 15-ah West Ham hneh vek mah se vawi 16-naa an tlawm avangin FA Cup aṭangin an tla. West Ham United hian fourth round-ah League one club Bristol City an hmachhawn ang.

Eng nge an sawi?

West Ham manager Sam Allardyce chuan, "Awihawm loh khawpin inkhel hmuhnawm a ni. Mipui pawhin an tih ve tho ka ring. Kan inkhel hi FA Cup a la thi lo tih nemnghettu a ni. Cup football-a awm tur zawng zawng a awmin ka hria, sawisel kai deuh a awm a, game ṭha kan hmu a, chance hlah kan hmu a, goalkeeping ṭha bakah goal ṭha kan hmu bawk," tiin a sawi.

Penalty aṭanga West Ham chakna goal khungtu Adrian chuan, "Penalty ka pet dawn khan ka hahdam a, ka khung ngei pawh ka ring. FA Cup kan la khel zel tur hi a lawmin ka hria," tiin a sawi.

Everton manager Roberto Martinez chuan, "Team ṭha zawkah ka inngai a, chance pawh kan nei. Goal khat kan khung hma khan goal khat emaw goal hnih khung thei tur kan ni. Inkhel hmuhnawm dan aṭanga thlir chuan kan khelh dan kha ka lawm tho mai. Football-ah hian duhthusamin thil a kal vek lo a, kal vek chu ni se penalty hlawhchhuak tur chu kan ni," tiin a sawi.