Copa del Rey quarterfinal-ah Espanyol

Thawhlehni zan khan Copa del Rey Round of 16 second leg khelh a ni. Espanyol-in an khingpui Valencia lehthalin quarterfinal an lut a; inkhel dangah Malaga an ṭang tlang a, aggregate-ah Levante 4-2 a hnehin a sang pali zingah an tel ve bawk.

Inkhelh ṭan hmaa dinhmun ṭha zawka ngaih Valencia-in bul an ṭan fuh lo a, minute 14-na lekah defender Shkodran Mustafi chu hnawhchhuah a ni. Espanyol-in player tam zawk an nih an hmang ṭangkai thei lawk lo a, minute 79-naah substitute Caicedo goal hmangin hma an hruai hram.

Espanyol tan quarterfinal lut turin goal khat hi a tawk a, away goal rule hmangin quarterfinal an thleng thei. Amaherawhchu Ecuadorian forward hi goal khatah a lungawi mai lo a, hun tawp hma hretin goal khat khung lehin Espanyol 2-0 in an chak a. Aggregate-ah Barcelona khaw club hi 3-2 in an chak.

Inkhel dangah first leg-a 2-0 a chak tawh Malaga-in first half-ah Ricardo Horta leh Recio te goal hmangin 2-0 in hma an hruai a, aggregate-ah 4-0 in hma an hruai hman.

Second half-ah Levante substitute David Barral-a'n goal hnih a khung a, quarterfinal lut tur erawh a danglam phah lo. Malaga leh Levante 2-2 in an inhnehtawk a, aggregate-ah Malaga 4-2 in an chak.