LA Lakers-in Trail Blazers an lehthal

NBA Playoff-ah regular season-a Western Conference hmahruaitu LA Lakers-in game 1-ah Portland Trail Blazers hneh lo mah se game hnuhnung pahnihah chakin 2-1 in hma an hruai leh tawh.

Zirtawpni zing khan game 2-ah Lakers-in 111-88 in an hneh a, nimin zing khan 116-108 in an hneh leh bawk. Lakers hi champion rinkai zinga mi an ni a, conference semifinal lut turin vawi hnih chak a la ngai. Game 4 hi August 25, Thawhlehni zing dar 6:30-ah khelh a ni ang. 

AdventHealth Arena-a inkhelah hian Portland-in bul an ṭan ṭha zawk a, halftime-ah pawh 57-53 in hma hruai mah se third quarter-a che ṭha Lakers-in hnehna an chang. Trail Blazers tan Damian Lillard che ṭha lehin point 34 a nei a, CJ McCollum-a'n point 28 a nei bawk. Amaherawhchu LeBron James hoin Lakers-in chetsual nawn an tum lo a, James hian point 38 leh rebound 12 neiin double-double a nei a, an chakna kawngah a ṭangkai hle.

LeBron tluk zeta Lakers tana ṭangkai Anthony David pawhin point 29 leh rebound 11 neiin double-double a nei ve bawk a, Trail Blazers tan thawhchhuah a har tawh dawn. Portland coach Terry Slotts chuan, "Fourth quarter-ah chak zawk tur kan zawng a, kan khingpuiten an luh laiin keini lamin kan lut lo," tiin an chak loh chhan a sawi.

Regular season-a che ṭha ber Milwaukee Bucks pawh an tho chhuak leh ta a, Inrinni khan Orlando Magic 12-107 in an hneh. Bucks hian 2-1 in hma an hruai leh tawh a, zanin dar 11:00 hian game 3 an khel dawn. Bucks chhuanvawr Giannis Antetokounmpo chuan point 35 a nei a, rebounds vawi 11 a la bawk. Bucks hian bul an ṭan ṭha a, 70-43 in halftime-ah hma an hruai tawh a, harsatna nei loin hnehna an chang.