National Games football atan Mizoram inbuatsaih ngawrh

35th National Games 2015, Kerala-a neih turah Mizoram team chu ngawrh takin an inbuatsaih mek. National Games-ah hian February 1-10 chhungin Kozhikode-ah football an khel dawn a, team pariat chiah an tling a ni.

Mizoram hi Group B-ah awmin India rama record nei ṭha ber zinga mi pathum - Punjab, West Bengal leh Services-te nen an awm kawp a, Group A lamah Kerala Tamil Nadu, Maharashtra leh Goa an awm bawk.

Group tin hi an inkhel kual ang a, a tawpah a sang pahnih ve ve semi final-ah intumin a chak pahnihin final an khel ang. National games-ah hian pathumna pawh zawn tur a ni ang.

Mizoram State Olympic Association duh danin Mizoram Football Association chuan National Games-ah hian team ṭha tak tirh a duh a, chuvangin Mizoram Premier League zawh taka champion team, kum tluana inkhelho ṭhinte chu innghahna berah a hmang a, anni bakah hian player mamawh club dang aṭangin a thlan belh bawk. Anni hian kum hlui aṭangin training an nei tawh a, January 6-ah chhunzawm lehin ngawrh takin inbuatsaihna kalpui mek a ni.

Tun ṭumah hian Santosh Trophy leh National Games hi a indawt chiaha khelh tur a nih avangin MFA chuan tournament pawimawh a indawta khel tura team pakhat rin aiin, tournament lian pakhata insawrbing tura team hrang pahnih din chu ṭha zawkah a ngai.

Assam-a Santosh Trophy Northeast Zonal Round khelh leh Kerala-a National Games inkarah hian hun âwl awm hman mang loa inkhelh zui a ngai dawn a, player-te Assam aṭanga Kerala an zin thlen chuan an chauin training-na hun an nei hman dawn loah MFA chuan a ngai a, chuvangin team pahnih din chu player leh team tan ṭha zawk turah a ngai.

MFA chuan Coca Cola Cup National Sub Junior Football Championship khel tura zin chhuak mek Mizoram Under 14 team, Santosh Trophy Northeast Zonal Round khel tura zin chhuak leh mai tur Mizoram team leh National Games-a football khel tura zin chhuak mai tur team pathumte duhsakna a hlan a ni.