Striker an kal kual dawn Bony a chiang, Eto'o a nghing, Falcao a chiang lo

Football-a transfer harsa ber chu striker lakluh hi niin an sawi a, player insawn zing ber an ni lawi si! January a ni a, player lut leh chhuak kan hmu nual a, striker ṭhenkhat an insawn dawn a, rimtu nei pawh an awm leh ta nual.

Bony a chiang

Wilfred Bony chuan Swansea chhuah­sanin Manchester City a zawm fel tawh niin Ivory Coast Football Federation chuan an puang. Bony hian City a pan dawn tih hi chiang tawh mah se African Cup of Nations an khelh mek avangin Bony hi a la inziak lut loa ngaih a ni a; nimahsela Ivory Coast Football Federation berin City-in an ziak lut fel tawh tih an puang a, "Bony hian January14, Nilaini hian Manchester City-a khel turin a ziak fel ta," an ti.

City hian pound maktaduai 28 vel an pe dawna hriat a ni a, kum 26 mi striker hi kum 2014 chhunga Premier League-a goal thun hnem ber niin goal 20 a thun a; tun season khelh mekah hian khelh 22-ah goal kua a khung tawh bawk a ni.

Eto'o a nghing

Football khawvela striker hlauh­awm ber pawl ni ṭhin Samuel Eto chu a khelh mekna Everton lamin an chhawr duh vak tawh lo a, Italian club Sampdoria a zawm dawn niin an sawi.

Cameroon striker hi Thawhlehnia Everton leh West Ham United-in FA Cup an khelh ṭumin squad-ah a tel tawh lo a, chhuak ngei tura rin a ni. Everton manager Roberto Martinez chuan inkhel tura a tel loh chhan sawifiahin, "Tun hnai darkar 12 chhungin club eng emaw zatin Eto'o lei tumin min dawr a, chuvangin inkhel turin kan ko ta lo a ni," a ti.

Kum 33 mi Eto'o hian Chelsea chhuahsanin Everton hi a zawm a, khelh 14-ah goal thum khung tawh mah se Everton tan beisei angin a khel lo. Khawvela footballer hlawh tam ber pawl a lo ni tawh ṭhin a, tun hmain Real Mallorca, Barcelona, Inter Milan leh Anzhi Makhachkala lamah pawh a lo khel tawh.

Falcao a chiang lo

Manchester United striker Radamel Falcao chu season tharah a chhuak dawn niin a lang ta. United-in loan-a an hawh mek Colombian striker hian tun season tawp thleng Old Trafford-a châm turin a inziak lut a, season tawpah United-in pound maktaduai 40-in an lei thei tiin an inrem bawk a; nimahsela United hian lei an tum lo a nih hmel.

Falcao agent Jorge Mendes chuan, "Manchester United a ni emaw ni lo emaw, season tharah khawvela cub

ṭha ber zinga mi-ah a khel dawn a," a ti zauh mai. Falcao hian kar khatah pound 2,65,000 vel a hlawh chungin United tan khelh 13-ah goal thum chiah a la thun a, tun hnaia Southampton an hneh loh ṭumin khelh chu sawi loh squad-ah pawh a lang phak lo.

Palace-ah Sanogo

Arsenal striker Yaya Sanogo chuan season tawp thleng khel turin Crystal Palace a pan.

Kum 21 mi striker hi Arsenal-ah a khel phak meuh lo a, Arsene Wenger chuan Premier League boruak tem tura inkhel tam turin a duh bawk si a, loan-in an chhuahtir ta a; Palace boss thar Alan Pardew hnuaiah a khel ang.

Pardew chuan, "Player naupang tak ni mah se player beiseiawm tak a ni a, chuvangin khelh tam a mamawh a, a thiam tak tak a ni tih Arsenal hnena lantir hi a mamawh a ni. Arsenal-ah chuan khelh phak a harsa a, kan team-ah chuan khelh tam a awl deuh ang," a ti.