German Consul General-in MFA Office tlawh Germany football nena inzawm MFA-in a duh

Kum 2012-a Mizoram German football coach pahnih an lo kal theihna tura sulsutu, German Consul General Rainer Schmiedchen chuan nimin khan Mizoram Football Association Office a tlawh a, MFA nen an thawh dun tawhna an thlir kir bakah hmalam huna thawhho dan tur an duang.

MFA lamin Germany football nena inzawm zel an duh thu an lo hrilh a, Rainer Schmiedchen chuan ama theihna chinah theihtawp chhuahpui a inhuam thu a sawi a, MFA hmalaknate a hmuhin a theihna kawng apianga puih a tum thu a sawi bawk.

Kolkata-a Consulate General of the Federal Republic of Germany-a an hotupa hian kumin chhungin Germany junior national football team chu India ramah an zin dawn tih a sawi a, Mizorama an inkhelh ngei theihna tura ṭanlakpui a tiam a, "Ka lo tih tawh angin Mizorama an lo kal theihna turin ka theihna sang ber thlengin ka ṭang ang. Mizoramah an inkhel ngei ang tih ka tiam thei lo a; nimahsela Mizorama Germany junior national team-te an inkhelh theihna turin theihtawp ka chhuah ang tih erawh ka intiam e," a ti.

Schmiedchen chuan Mizoram football hmasawnna a hmuhin lawm thu a sawi a, "India rama khaw chhak (East India) chin zawng hi ka bial a ni a, he mi chhunga football association nung ber leh thawk ṭha ber in ni tih in hnathawhah ka hmu thei. Nangni nena thawhho zel hi kan duhthusam a ni," a ti a; German Consulate office-in an puih theihna chinah chuan puih a inhuam reng thu a sawi.

MFA aiawha thusawitu Honorary Secretary Lalnghinglova Hmar chuan MFA hnathawhte a sawi bakah German Consulate nen an indawr ṭan dante a thlir kir a, "Min puih tawhnaah kan lawm takzet a, a tawpna ni loa nakin zel thlenga thawhho hi kan duh a ni. Germany-a coach ṭha tak tak in rawn tirh avangin Mizoram football-in hma a sawn a, German football coach-te bula an awm avangin inrintawkna pawh an neih phahin kan hria," a ti.

Nakin zel thlenga thawhho an duh tih sawiin MFA Honorary Secretary chuan, "India leh Germany football inthlauhzia kan hria a, chuvangin coach ṭha rawn tir leh turin kan ngen che u a, kan naupang football thiam bikte Germany-a training-na tur min ngaihtuahpui turin kan ngen bawk che a, football hmasawnna tura min puih theihna a awm chuan MFA hi min hre reng ṭhin ang che," tiin a chah.

Rainer Schmiedchen hian kum 2012 khan Mizoram a lo tlawh tawh a, he mi ṭum hian MFA hruaitute nen inkawmin Mizorama German football coach-te an lo kal theihna tura hmalakpui tura an ngenna chu a takin a tihlawhtling a; German football coach pahnih Lutz Pfannenstiel leh Felix Imm-te chuan October 1-6, 2012 chhungin Mizorama football coach-te hnenah training an pe a ni.

Kum 2012-a lo kal football coach-te hi Germany-a football thuneitu sang ber Germany Football Federation-in an rawn tirh an ni a, an kal man sensote hi Germany sorkar tum vek a ni a, MFA-in an thlenna leh ei leh in man an tum thung. Hei mai hi ni loin Germany Football Federation chuan MFA hnenah football leh training-na bungrua ṭhahnem tak an pe bawk.

German Consul General Rainer Schmiedchen hi a nupui Dr Annette Schmiedchen-in a ṭawiawm a, MFA lamin an nupa hian thilpek an pek bakah kum 2012-a German coach-te chet velna thlalak hrang hrang a bua siam an hlan a, German Consulate hian MFA hnenah thilpek a hlan ve bawk a ni.