Uruguay hnehin Colombia an tlang; Final-ah Argentina an hmachhawn dawn

Colombia chuan Copa America final-ah Argentina an hmachhawn dawn. James Rodriguez leh a ṭhiante hian nimin zing khan Uruguay chu 1-0 in an hneh a, goal awmchhun hi Jefferson Lerma khung a ni.

Nimin zing inkhelh banah buaina a chhuak a, khelmual sira insual buainaah Darwin Nunez chu tel vein hliam tuar lo mah se a chetla lai hi social media hrang hrangah a darh nasa hle.

Goal khat a tawk

Team pahnih hian tournament an khel ṭha hle a, champion tura rinkai an nih phak avangin an khel pawh a hmuhnawm. Uruguay striker Nunez-a'n Colombia player pahnih hual vel karah ṭha takin a shot a, mahse goal ban hrulah a kal chhuak chiah.

Liverpool hmatawng hian a hnuah pawh hun a ṭha a nei, box chhung aṭanga a pet chu goal zawnah a kal lo chiah bawk a, coach Marcelo Bielsa nau ten an hun ṭha an chhawr thei tlat lo.

Minute 39-naah goal kan hmu, midfielder Jefferson Lerma chuan a tauh lut, a siamsaktu chu James Rodriguez bawk a ni - Real Madrid player hlui hian Copa 2024 khelh laiah a ṭhiante goal khung tur vawi ruk a siamsak tling ta chiah.

South American ramte football inelna lianah hian, tournament vawi khata assist nei tam ber chu Lionel Messi a ni ṭhin, an champion ṭum khan vawi nga a nei, record dinglai hi Colombia captain Rodriguez hian a rawn khum ta chiah.

Player 10

Chawlhlawk hma chiahin Daniel Munoz chu hnawhchhuah a ni, Crystal Palace defender hian Uruguay midfielder Manuel Ugarte chu a nghawk a, hrem niin hun chanve dang chu kim loa khel turin a ṭhiante a chhuahsan.

Colombia coach Nestor Lorenzo-a'n goal neih belh aiin a venhim a pawimawh zawk tih a hrechiang a, inkhel ti muangin a hnung lamah an inhnawh khawm - Uruguay tan tawnhriat neu ṭha Luis Suarez rawn lut pawhin result a ti danglam ta lo.

Lorenzo chuan, "Uruguay kha team ṭha tak an ni, coach leh player pawh an ṭhain ka ngaihsan tak te an ni. Goal kan nei hmasa a, chumi hnuah kan kim lo. Kan kim loh tirh pawh khan striker pahnih kan la hmang, khatiang chunga kan chak kha chu a lawmawm bik," a ti.

Tun hnaiah Colombia hi match 28 chhung chu tlawm loin an kaltluang ta, heng zinga match 25 chu coach Lorenzo kaihhruaina hnuaia an khelh a ni, kum 1992-1994 chhunga match 27 an tlawm loh record chu an khum ta chiah.

Bielsa mawhphurhna

Champion tura rinkai zinga mi an ni a, player an nei ṭha bawk - mahse Colombia hneh loin an tla ta si. Uruguay coach Marcelo Bielsa chuan an chak lo chu ama mawhphurhna a ni tih a sawi a, player kim lo an hneh lo chu pawi a ti hle.

Uruguay coach Bielsa chuan, "Player malkhai en ila kan ṭha zawk. a nihna tak sawi chuan kan khingpui team ai khan kan squad a chhahin ka naute pawh an ṭha zawk hleah ka ngai, chutiang team chu ka enkawl a ni.

"Mahse, player 10 an nih hnuah pawh goal kan khung thei tlat si lo. Player ṭha tak tak neih bakah hun remchang ṭha lutuk nei chunga kan tlang thei lo kha chu ka mawhphurhna a ni a, dem tur dang an awm lo," tiin a sawi.

Copa America vawi 15 champion tawh hian an tum ram an thleng zo ta si lo a, tunah chuan Canada nen pathumna an inchuh a ngai dawn a ni. Bielsa hian tournament zawh hunah a hna ngai a thawk chhunzawm ang em tih pawh sawi lawk theih a ni ta lo.