Chhei raw khah... football-in rûn a lawi dawn e!

England fan-ten hlim takin, "It's coming home..." tih hla an sa leh thei ta a, Pathianni zanah a aia ring zawkin he hla hi sak chhunzawm an beisei ang - European Championship 2024-ah final an lut.

Three Lions hian 2-1 in Netherlands chu semifinal-ah an hneh a, inelna ṭantir lama anmahni au eltu fan-te khan fakna hla an sa a, hnawmhnawk vawm luttute kut chu anmahni lawm nan a phar chhuak ta zawk - aw, football hringnun iva timawi ṭhin em!

Netherlands hian Xavi Simons hmangin goal hmahruai an khung a, mahse, English rilru huaisen tukdawl nan a tling tawk lo - Harry Kane-a'n penalty hmangin si phurh a sut a, amah thlaktu Ollie Watkins-a'n chakna goal a khung zui.

England-in Netherlands hnehin Euro final an lut a, July 14, Pathianni zan dar 12:30-ah Spain nen Europe roreltu nih an inchuh dawn - Football-in run lawi zai rel tak ang maw?

Sakeibaknei hahum

England football team hminglem chu "Three Lions" a ni a, mahse, semifinal hial an thleng chungin, "Lions" an nihna hmuh tur a awm lo - Nilaini zanah erawh England an danglam ta a, Sakeibaknei a hahum chuan tuin nge maw hlau lo ang le?

Three Lions hian sawiselna leh beisei phak loh vanga selna zawng zawng hnuchhawnin, Netherlands lakah an khel ṭha takzet a, mahse, heti chung hian goal khung hmasa zawk erawh Netherlands an ni - Xavi Simons nen ball an inchuhna lamah Declan Rice a tlu a, a chesual.

Simons hian chak taka ball tlanpui zuiin, minute sarihnaah box pawn aṭangin goal hmahruai a khung. Goal ṭha bik a ni a, English keeper Jordan Pickford tan tihtheih a awm lo. Netherlands an phur a, an hriat loh erawh sakeibaknei meiah an pawt tih chu a ni!

England-in chak ngei duhin, na takin an nawr let a, minute 16-naah penalty an hlawh chhuak. Harry Kane-a goal shot tur chu Denzel Dumfries-a'n dan tumin a ke a khai sang hret a, na ti takin Kane a tlu - referee-in Video Assistant Referee a rawn hnuah penalty spot a kawk a, Kane-a'n harsatna nei loin goal-ah a chantir.

Inkhel hmuhnawm

England-in goal an khung hnuah inkhel an thunun chhunzawm a, an vanneih zan ni se, chawlhlawk hmaa goal dang khung belh thei an ni. Tun inelnaa beisei phak lo Phil Foden-a'n thaibo chi a nih lohzia pholangin Dutch defender rual a lam khum.

Goal an khung aṭanga minute li hnu lawkah Foden hian Dutch defender rual a bum hnuah, goalkeeper Bart Verbruggen-a kap karah a thawlh lut a - goal mai tawh tura a lan laiin penalty chawitu Dumfries chuan goal line-ah a lo dang!

Netherlands lamin chance nei lo an ni bik lo - Memphis Depay-a ball pek ṭha tak chu England tlarhnung tihṭhat vangin Donyell Malen-a'n duhthusamin a shot hman lo a, Dumfries chuan uiawm lutukin goal bar a tauh per bawk.

England tan Foden a hmuhnawm chhunzawm a, mahse, Manchester City midfielder hi a vanneih zan a ni lo. Uiawm takin goal post a pet per a, a chance neih ṭhat dan chu Brighton & Hove Albion goalkeeper Bart Verbruggen chuan ṭha zetin a dansak bawk - a vanduai hle.

A hmawr bawktu

Goal dang lut loin chawlhlawk hman a ni a, second half-ah Netherlands an hmuhnawm sawt. Captain Virgil van Dijk-a'n hnai set sawtah goal khung theihna remchang nei mah se, Pickford-a'n ṭha takin a dansak a, England an vannei.

Mual vei lam sirah Cody Gakpo a hnawksawk a, Liverpool forward hi English player-ten an chelh meuh lo. Mahse, tun inelnaa goal thum khung tawhtu hian a pawimawh ber goal a keng tel lo a, a ball thlawh luh ṭha tak chu Pickford-a'n a dansak a, Simons tana a siamsak chu Paris Saint-Germain attacking midfielder hian goal-ah a chantir thei lo bawk.

England tan Bukayo Saka-a'n hmahruaina goal a khungah inngai mah se, ball petu Kyle Walker-a offside vangin pawmsak a ni lo. England coach Gareth Southgate-a'n minute 80-naah inkhel tidanglamtu substitution a siam zui a, Kane leh Foden la chhuakin, Watkins leh Cole Palmer an lut.

Minute 90-na a ni a, extra time en turin fan-te pawh an inring tawh. Mahse, Palmer-a'n Netherlands tlarhnung awl lai hmuin, Watkins tan ball a thawlh lut a, Aston Villa striker hian mawi zetin goal-ah a chantir - Netherlands tan thawhlehna hun a awm tawh lo a, England an chak a, "Football-in run a lawi dawn e" tih chu a thunawn a ni leh ta!