Tlai dar 3:30-ah MPL10 final rematch : Mizoram Police FC Vs Chanmari FC

LZ Juice MPL11-ah vawiin tlai dar 3:30 hian Mizoram Police FC leh Chanmari FC te RG Stadium-ah an inkhel dawn. MPL10 final-ah khan Police-in Chanmari hnehin a vawi khat nan MPL nomawi an chawi a, nomawi duha tuihal Chanmariin coach Lalsangzuala Hmar an lalut nghal.

Vawiin tlai MPL inkhel hi Police leh Chanmari inkhel tur a ni ringawt lo a, coach Lalbiaksanga Colney leh Sanga te inbeihna a ni tel. Team pahnihin player an nei ṭha ve ve a, football hmuhnawm a beisei theih ang.

Police an la ngai!

BS-a Colney enkawl Mizoram Police hi MPL10 aṭanga thlirin an la danglam tam lo a, NorthEast Olympic hnuhnung bera Mizoram tana silver medal latute tiin a sawi theih. Police hian season liam taa Chhinga Veng tana khel Isaak Malsawmkima an lalut a, mual sirah hmun pawimawh a chang nghal.

Tlarhmaah Malsawmfela a la awm a, a thlawp turin F. Lallawmkima leh Lalbiakhlua (Biaktea) te an la awm. Midfield-ah MPL10 best player H. Lalbiakthanga leh R. Malsawmtluanga te an inkawp. Season liam ta khan, Police player-te an upa hret tawh tia sawi tawk an awm a, nomawi erawh an chawi tho. MPL11 ṭan meuh chuan kum khatin an upat belh leh tawh a, player naupang zawk lakah an theihna fiahin a awm ang.

Chanmari hi team ṭha zawka ngaih an nih avangin Police tan tlarhnung tihphui a pawimawh dawn. Ramhlun Athletic lakah Police-in goal hnih an chhuah a, goalkeeper F. Lalmuanawma bakah a hmaa ding Lalmunmawia leh Laldinpuia ten an rilru an pek lehzual a ṭul. Right back-ah Lalrinzuala Khiangte a la ṭangkai reng a, left back-ah civil player Lalrodawngkima aia Lalruatpuia a rawn lut a nih pawhin a mak lo ang.

Phuba lak tum?

Police hian MPL10 final-a Chanmari an hneh bakah se mifinal-ah Lalsangzuala Hmar enkawl Chhinga Veng an hneh bawk. Tun ṭum Chanmari FC hi season liam ta Chanmari leh Chhinga Veng chawhpawlh tia sawi theih an ni a, Police laka phuba lak an châk ang.

Chanmari vanduaina erawh match hmasa bera FC Bethlehem an hneh ṭumin striker Lalkhawpuimawia a inhliam a, Kelkang striker Mapuia hi a hmai ruh (mi ko bul) hmun hnihaa a tliah avangin an zai a, a chawlh rih a ṭul dawn.

Mapuia awm lo mah se Chanmariin Lalnunzama an kawl a, Laipuitlang tlangval thlawp tur hian MS Dawngliana a awm. MPL1-a Chanmari tana top scorer Dawngtea hian match hmasa berah goal hnih a khung nghal der.

Chanmari hian midfield-ah Aizawl FC aṭanga an lakluh K. Lalhmangaihkima leh Malsawmzuala te an inkawptir a, tawnhriat an nei ṭha ve ve. Tlarhnungah captain Lalrinchhana Tochhawngin a ho a, goalkeeper-ah Zothanmawia a awm bawk.

Chutihrualin en châkawm tur erawh Police defender hmaa KC Malsawmsanga leh Moses Lalrinzuala te chevel hi an ni a, beisei an pha ta lo a nih pawhin a thlakna turin Lalrokima leh Vincent Lalduhawma te an la awm.

Chanmari hian Sanga hoin Police lakah point thum hlawh chhuah ngei an tum ang a, mahse an rin ang ngawt a ni dawn lo. Police chu Police an ni tlat a, match hmasa berah pawh an khel ṭha tawk lo chungin point thum an hlawh chhuak.