Ramhlun nge ṭha zawk Bethlehem?

LZ Juice MPL11-ah vawiin chhun dar 12:30 hian MPL team thar pahnih Ramhlun Athletic leh FC Bethlehem te an inkhel dawn. Round 1-ah team pahnih hian point an hmu lo ve ve a, hei vang hian vawiina an inkhel tur hi a pawimawh lehzual ang.

Danny Lalduhawma enkawl Ramhlun Athletic-in MPL an khelh hmasak berah Police tan buaina an siam thei a, injury time-a goal an chhuah vangin point an sual chhuak ta lo. Ramhlun hian point hmu nghal lo mah se an khelh danah lawmna tur a awm.

Captain Flavius Lalruatkima chu defensive midfield-ah a ṭangkai a, ke dinglam leh vei lama ball a pet theih bakah team a uap ṭha. Tlarhmaah Richard Ramnunpuia leh Felix Lalruatsanga ten theihna an nei sang a, Bethlehem tan ven uluk an ṭul ang.

Bethlehem hi coach Lalhriatpuia Sailo-in an enkawl a, minute 70 chhung Chanmari an chelh thei. FCB midfielder pahnih F. Malsawmdawngpuia leh H. Zawnhmingthanga te an thiam a, mahse hun loah ball hloh leh tihsual an neih ṭhin avangin insiamṭhat an mamawh.

Ramhlun Atheltic leh Bethlehem hi match hmasa bera an khelh dan thlirin inkhel tawk tura ngaih an ni a, an player neih danah pawh ṭha zawk tia sawi tur an awm lo. Team ṭha zawk chu vawiin chhuna an inhmachhawn hunah a chiang ang.