Djokovic hmachhawn tur Musetti

Wimbledon 2024 semifinal chu zanin hian khelh a ni dawn. Vawi sarih champion tawh Novak Djokovic hmaah Lorenzo Musetti a ding dawn a, inkhel dangah Daniil Medvedev leh Carlos Alcaraz te an inhmachhawn thung dawn a ni.

Serbian star Djokovic a vannei, quarterfinal an khelh ṭan hmain a khingpui tur Alex de Minaur chu khel bawr hliam vangin a inhnukdawk a, inkhelh hah ngai miah loin Djokovic hi a tlang, atan duhthusam a ni ngei ang.

A tawpah Musetti

Hnehna a chan hnuah Lorenzo Musetti chuan, "Ni mak danglam bik tak a ni a, tennis ka khelh ve tawh chinah chuan ka hun tawn duhawm leh ṭha ber a la ni hial," a ti, a thil sawi hian inkhel boruak a ti lang chiang viau.

Musetti hian set a hloh hmasa a, hei bakah hian a service a hloh zui leh avangin a dinhmun a ṭha lo. Mahse, a tawpah Taylor Fritz chu 3-6, 7-6 (7-5), 6-2, 3-6, 6-1 in a hneh a, semifinal a in vaw kai.

Fritz hian a match hmasa lamah Alexander Zverev a lo hneh tawh a, set hnih a hloh hnua tho chhuak a ni. Quarterfinal an khelh dawn pawhin inrintawkna a nei sang hle, set a lak mai bakah set hnihnaah pawh a khingpui service a chhuhsak.

Musetti-a'n a set point hmuh hmasak chhawr ṭangkai nghal mai lo mah se a beidawng lo a, zawi muanga insiamṭhain set hnuhnung ber an khelh phei chuan game khat chauh hloh chungin a tlang, atan ni chhinchhiah tlak a ni.

Fritz hi a vanduai thei hle, inelna lian Wimbledon, US Open leh Australian Open-ah te quarterfinal a thleng vek tawh a, mahse final lut zo loin a zinkawng a tawp vek a ni - American tlangval zinga Wimbledon champion thei 16-na nih a tumna chu a hlawhchham leh ta rih.

Hmabak Novak

Lorenzo Musetti chuan Wimbledon semifinal a thlir lawk a, tun hma lama vawi ruk a hmachhawn tawh aṭanga vawi khat chauh a la hneh Djokovic a hmachhawn dawn avangin a kawng a awlsam dawn lo.

Italian tlangval Musetti chuan, "Novak hi player ṭha bik a ni a, a bik takin Wimbledon hi a inkhelh thiamna hmun a ni, a ti chiangtu chu champion hnem lamah pahnihna a ni thei, a sulhnu hi a nep lo hle.

"Inkhel harsa leh hautak tak a ni dawn a, chutihrualin kei pawh hi chona hmachhawn chak mi ka ni a, ka hmaah tih tur awm hlenchhuah duh mi ka ni, chuvangin he chona hautak hmachhawn hi ka chak," tiin a sawi.

Seeded 23-na Musetti hian tun inelna kal laiah player lian tak hmachhawn a la nei lo, seeded 13-na Fritz hma khan seeded chang phak player an tawng miah lo, chuvangin eng ang taka ṭha nge a nih chu Djokovic lakah a hriat ang.

Serbian star Djokovic hian kuminah nomawi la chawi lo a, khup hliamin a tibuai a, fans lamin an auel nasa bawk. Tunah chuan Djokovic khup a dam tawh a, tun ṭum inelna hi insiamṭhat theihna hun ṭha a ni.

Alcaraz vs Medvedev

Mipa champion lai Carlos Alcaraz leh Daniil Medvedev inhmachhawn tur hian ngaihven a hlawh, theihna nei sang leh thiam bik zinga mi an ni a, inkhel tawk hle tura ngaih an nih avangin ngaihven an hlawh hi a mak lo.

Spanish tlangval Alcaraz hian Rafael Nadal hnung zuiin French Open hnuah Wimbledon champion leh a tum dawn a, chumi tur chuan match hnih chak a la mamawh, quarterfinal thlenga a khelh tawh dawn thlir chuan theihna a nei.

Tun season Wimbledon hmain player pahnih hi vawi ruk an inhmachhawn tawh, hengah te hian Alcaraz hi vawi li chakin ṭum hnih a chak lo, record nei ṭha zawk a nih bakah nomawi a kawl mekna a nih avangin rin a hlawh deuh zawk ang.

Medevedev hi dah hniam chi erawh a ni bik lo, hard court-a inkhelh thiam ni mah se tun hnai hian clay leh grass-ah hma a sawn hle a, kumina semifinal a thleng pawh hi a mak lo, a service na tak chu hman ṭangkai leh a tum dawn a ni.

Semifinal thleng tur hian world number 1 Jannik Sinner nen set nga an khelh hnuah a chak thei a ni a, a rilru a paukhauhin a huaisen tawk tih a chiang bawk. Euro 2024 inkhel awm loh zanah tennis inkhel hmuhnawm en tur a awm dawn e.