Nishikori a la dam lo

US Open khelh nan ni sarih chauh a awm tawh a, tournament khelh tum Kei Nishikori chu coronavirus lak aṭangin a la fihlim thei lo. Grand Slam inelna hmachhawn tur chuan hripui a kai lo a ni tih endikna vawi hnih a paltlang a ngai dawn.

Japan tlangval tennis khel thiam hi tun thlatir lam khan Covid-19 a kai tih hmuhchhuah a ni a, Cincinnati Masters khel turin inbuatsaih mah se a inhnukdawk - khung hran zui nghal a ni.

Tun kar tawp khan hri lakah a fihlim tawh em tih endik leh a ni a, a la fihlim lo. US Open khel turin dam hman tehreng pawh ni se a ṭhat dan berin a inlan thei dawn lo tih a chiang a, rinkai zingah a tel phak lo ang.

Kum 30 mi Nishikori chuan, "Natna ka nei hran lo, mahse endik ka nih hnuah coronavirus ka la kai. Tun kar chhung hian a vawi thum nan min endik leh ang, US Open khel tura ka dam hman ngei chu ka beisei," a ti.

US Open hi August 31 aṭangin New York khawpuiah an khel dawn, hri leng a nasat avangin mipa leh hmeichhe singles champion lai Rafael Nadal leh Bianca Andreescu te chuan an inlan theih loh tur thu an tichiang tawh. Player langsar ṭhenkhat inlan thei dawn lo mah se world number 1 Novak Djokovic leh American star Serena Williams te erawhin khelh ngei an tum ve thung.