Euro 2024 top scorer Dani Olmo elpui tur Harry Kane?

Euro 2024-ah match 50 khelh tawh niin goal 114 a lut tawh a, match tina goal 2.28 lut ang a ni. Goal 100 chuang lut tawh mah se player zingah erawh goal khung tam fal an awm lo a, final chauh khelh tur a awm tawh nachungin top scorer tur a la chiang lo.

Semifinal-ah Spain forward Dani Olmo-a'n France lakah chakna goal a khung a, RB Leipzig forward hian tun inelnaah goal thum khung tawhin assist vawi hnih a neih bawk avangin top scorer ni thei dinhmunah a ding mek.

Euro 2024-ah hian goal khung zat a inang a nih chuan assist ngah dah pawimawh tur a ni a, an la inang cheu chuan minute khel tlem en leh tur a ni. Tun inenaah hian Olmo bakah Georges Mikautadze, Cody Gakpo, Ivan Schranz, Jamal Musiala leh Harry Kane ten goal thum an khung tawh.

Chutihrualin goal thum khung zingah Olmo leh Kane te chauhin khelh tur an nei tawh a, England captain hi Olmo elpui berah a ngaih theih. Kane tan Olmo hi minute khelh tlemah tluk ngaihna a awm tawh lo a, chuvangin Spanish forward chunga awm theih dan ṭha ber chu final-a goal khung a ni.

Goal hnih khung zingah Fabian Ruiz leh Jude Bellingham te an la tel bawk a, PSG midfielder Fabian Ruiz-a'n assist vawi hnih a nei tel tih hriat tel a ṭha bawk.