Europa League roreltu Sevilla

Sevilla chuan Europa League khel thiam bik an nihna an nemnghet nawn. Spanish club hian Inter Milan chu 3-2 a hnehin a vawi ruk nan an champion a, manager Julen Lopetegu-a'n season tira thutlukna huaisen a siam rah a seng, manager a nih hnua a nomawi hmasa ber a chawi.

Zirtawpni zan khan RheinEnergieStadion, Cologne-ah final khelh niin, striker palian Romelu Lukaku-a'n a tirah Inter tana penalty a chhuih luh bakah hun tawp dawn lamah an lamah a ti lut a, Belgium international tan zan lungngaih thlak a thleng.

Covid-19 vangin a hmunah entu an awm thei lo, mipui 50,000 lenna stadium-a inkhel ni mah se Sevilla lamin ticket an neih zat chu 25 chauh a ni a, hei pawh hi official tan a ni - heng zinga pahnih chu fans tan an pe; a hmuna entu fans pahnih chauh an awm.

Season dang ang chu ni se, stadium khatin mipui an pungkhawm ang a, final inkhel hmuhnawm bakah khelmual chheh vela fans phusa leh authawm chu mit leh beng titlaitu a tling ang - kuminah erawh Covid-19 vangin a khawhar thlak hle.

Minute ngana lekah Lukaku-a'n a tha chakna leh tlan chakna hmangin box chhungah ball a lalut a, defender Diego Carlos-a'n lo ti tluin Belgian striker-in penalty a hlawh. Manchester United striker hlui hian season kal laia a goal 34-na atan chiang zetin a khung.

Goal phur mah se Spanish club an buai phah lo, striker Luuk de Jong-a'n captain Jesus Navas leh Ever Banega te siamsak tauh lutin hma an hruai let, chawlhlawk hma deuhin Diego Godin chuan tauh lut ve lehin 2-2 in an chawl.

Second half-ah goal a awm thei mai lo, extra time an khel dawn niin a ngaih theih hman. Minute 74-naah a tir lama penalty chawitu Carlos-a'n box chhunga ball hlauhawm vak lo nia lang chu a 'overhead kick' a, goal pawna kal tur ni mah se Lukaku-a'n lo tawk palhin an goal-ah a lut, 3-2 in Sevilla an chak.

World Cup-ah Spain enkawl tur ni mah se Real Madrid nen an inbiakrem avangin chawpchilh taka ban a ni a, beiseina sang tak nen Spanish club lian zawm mah se rei vak lo hnuah Julen Lopetegui chu an ban leh si. Nikum June aṭang khan Sevilla hi a enkawl, hun rei loteah a siam ṭha hman hle.

Sevilla hian nipui bazarah player an chan hnem, hming langsar lo an khawn khawm thung. Inter laka inkhel bul ṭantu zinga player pakua ngawt kha club tana an season hmasa ber hmangtu an ni hial, khelmual chhungah erawh hun rei tak khelho tawh ang maiin an in man.

Spanish coach hian United hmaa match 11 goal khung loa awm De Jong chungah rinna a nghat ngam, Dutch striker hian a pu rinna ti thlawn loin Manchester United laka chakna goal a khung bakah, inkhel pawimawh final-ah goal hnih a khung zui, a pu beiseina chu thil tih hmangin a chhang.

Wolves leh Manchester United laka penalty a chawi hnuah Carlos-a'n Inter lakah pawh a chawi leh, Brazilian defender laka zahngaihna lantirin a thlak duh lo a, a tawpah erawh an chakna goal hlawh chhuaktu a ni a, a tihsualte theihnghilhsak nghal a ni.

Antonio Conte-a'n Inter Milan tan phur tharna nasa tak a thlen a, league lamah pawh an che chhe lo. Serie A-ah pahnihna niin, champion Juventus an phak lohna chu point khat chauh ni mah se nomawi an chawi lo - Europa League lamah pawh thawnthu a danglam thei rih lo.

Italian manager hian nipui lai khan Premier League aṭangin player panga a lalut, wing back Ashley Young chi final-a inkhel bul ṭantu zingah a tel. 3-1 a nih hnuah bench aṭangin Alexis Sanchez, Christian Eriksen leh Victor Moses te a dahlut.

EPL player hlui hian danglamna an siam thei bik lo, forward Sanchez-a khung tur chu goal line bul aṭanga pet chhuahsak a ni a, midfielder Eriksen-a'n inkhel thunun turin hun a nei tam tawk lo a, wing back Moses-a'n cross hlauhawm a nei thei bik lo.

Chelsea manager hlui hian hlawhtlinna duhin a theihtawp chu a chhuah, khelmual pawn aṭanga referee Danny Makkelie thutlukna a sawisel nasat avangin yellow card pek a ngai hial, a duh ber nomawi chawi ta lo mah se theihtawp an chhuah miau avangin fak a phu.

•    Inter hi 1997 UEFA Cup hnua a vawi khat nan European final an khelhah an chak lo, an chak loh hnuhnung zawk hian German club Schalke an ngam lo.

•    Kum 2009-10 season aṭanga chhutin, nomawi chawi theih 11 awm zinga paruk chu Spanish manger ten an chawi. (Unai Emery x3, Quique Sanchez Flores, Rafael Benitez, Julen Lopetegui).

•    Sevilla hian Europa League knockout match 22 an khelh tawh zinga vawi 21-ah hnehna an chang.

•    Inter defender Diego Godin hian European Cup/Champions League leh UEFA Cup/Europa League final-ah goal a khung tawh, ani hma hian Steven Gerrard, Hernan Crespo, Dmitri Alenichev, Allan Simonsen leh Pedro ten an lo khung tawh bawk.

•    Kum 2001 hnu lamah Lukaku (5') goal khung kha UEFA Cup/Europa League final-a goal lut rang ber a ni, 2001 khan Liverpool forward Markus Babbel chuan Alaves lakah minute thumna lekah a lo khung tawh.

•    Tun season Europa League-ah Diego Carlos-a'n penalty vawi thum a chawi, Chelsea defender Casar Azpilicueta (2012-13) hnuah Europa League season khata penalty chawi hnem ber 

a ni.