Reyes leh Puerta tan ka hlan - Navas

Sevilla captain Jesus Navas chuan Europa League nomawi an chawi chu an player thi tawh Jose Antonio Reyes leh Antonio Puerta te tan a hlan thu a sawi chhuak, hlawhtlinna an chan laia a 

ṭhiante a hre reng.

Nikum khan Reyes hi car chesualah kum 35 mi chauh ni chungin a thi a, 2007 khan kum 22 mi chauh defender Puerta chu a inzir chhuahna club tana a khelh laiin khelmualah a tlu a, nunna a chan zui.

Navas chuan, "Sevilla captain ni chunga hetiang nomawi chawi theih chu ka tan a ropui hle, he hlawhtlinna hi kan zinga awm ve tawh lo Puerta leh Reyes te tan ka hlan. Kan zavaia thawhrimna vanga hetiang dinhmun thleng thei hi kan ni," tiin a sawi.

Manchester City winger hlui Navas chuan sawi zawmin, "Coach Lopetegui hian Sevilla tan nikhatah darkar 24 hna a thawk, hetiang hlawhtlinna chan hi a phu a ni," a ti. Spain leh Real Madrid manager hlui Lopetegui pawhin lawmthu sawiin, "Sevilla hi club ropui tak a ni, nomawi hi fans lam pawhin an lawm ngei ka ring. Ka naute hian rinna, beiseina leh huaisenna an nei a, chak lo pawh ni ila an chungah ka lawm tho ang," a ti.