Mangṭha Ever Banega

Argentina midfielder Ever Banega-a'n Sevilla tana a match hnuhnung ber a khel a, season tharah chuan Saudi Arabia club Al-Shabab tan a khel tawh ang - Spanish club tana a hun hnuhnung berah nomawi a chawi.

Banega hian Sevilla tan hian 2015, 2016 leh 2020-ah Europa League nomawi a chawi, 2018 khan Copa del Rey-ah pahnihna a nihpui bawk. Club tan hian a season hnuhnung berah pawh player pawimawh leh inkhel khai dingtu a la ni phak.

Kum 32 mi Banega chuan, "Sevilla tana ka hna thawh tur chu ka thawk zo tawh, match hnuhnung berah hetiang nomawi kan hlawh chhuah theih avangin ka teammate-te chungah ka lawm takzet, inchhuang takin ka chhuak thei dawn.

"Hamrik hnuhnung ber a rik khan Julen Lopetegui nen kan inkuah, ani hian hun harsa leh rilru hnual taka ka awm laiin chakna min pe thar a, tunah chuan rilru thawveng takin hnehna kan chan hi ka lawm thei ang," a ti.

Banega hian 2014 khan Sevilla a pan, season hnih a khelh hnuah Inter Milan lamah a kal - San Siro-ah hian season khat a hman hnuah Sevilla-ah bawk kir lehin, season thum a khelh leh hnuah a mangṭha.