Vawiin aṭangin MPL4 Qualifier Chawhnu dar 2:00-ah Zotlang FC Vs Electric FC
Mizoram Premier League Season 3-ah Aizawl FC an champion a, nikuma MPL3 final kha 2014/15 season tawpna a ni lo. Khelh hmabak zingah vawiin aṭanga ṭan tur MPL4 Qualifier hi a tel a, MPL4 khel tur team zawnna a ni.
Vawiin chawhnu dar 2:00 hian Lammualah Lunglei Super League champion Zotlang FC leh Electric FC te an inkhel dawn a, match hmasa ber aṭangin a pawimawh nghal ang.
MPL4 Qualifier chu engnge?
Ṭum danga Playoff tih ṭhin kha tunah chuan Qualifier tih a ni tawh. Qualifier-ah hian District FA pariatte'n team pahnih ṭheuh an thawh theih a, a khelh dan hmang chu round robin league a ni. Vawi khat ṭheuh khelh kual zawha point hmu sang berin MPL4 an khel thei ang a, pahnihna erawhin MPL3 pasarihna Reitlang FC nen double legged relegation playoff an khel thung ang.
MPL4 Qualifier khel tur hi team pali an awm a, vawiin khel tur Zotlang FC leh Electric FC bakah hian Luangmual FC leh Upper Republic FC te an awm. Zotlang FC hi Lunglei DFA aiawh an ni a, Electric FC leh Upper Republic FC te hi Aizawl DFA aiawh an ni. Luangmual FC tel dan erawh a dang; anni hi MPL2 finalist an ni a, final-a an supporter-te chet mawi loh vangin kum khat chhung hrem an ni a, MPL khel leh turin qualifier an paltlang erawh a ṭul thung.
Thlirlawkna
MPL3 Qualifier-ah Zotlang FC leh Electric FC te hi an inhmachhawn tawh a, Lunglei club Zotlang FC player pakhat hnawhchhuah a nih hnuah Electric FC-in 3-2 in hnehna an chang. Qualifier khelh zawhah team pahnih hi MPL khel turin an tling pha lo ve ve a, Zotlang hi Electric FC chungah an awm. An player neih dan thlirin vawiin inkhel turte hi an intum tawk ang.
Electric FC hian veng pawn player pathum chiah an nei a - defender K. Laldintluanga, winger Lalsangzela leh forward KC Lalruatkima te chu an player pawimawh tur an ni.
Vengchhung player zingah Lalbiakthanga a langsar a, Electric FC midfielder BT-a hian Luangmual FC tana a khelh laiin Chanmari FC lamah goal khungin MPL history-a goal khung hmasa ber a ni.
Zotlang FC-ah pawh tawnhriat nei player an tam bik lo. Keeper Eddie Zorammawia hi Aizawl FC Academy chhuak a ni a, MPL3 Phase-ah Lunglei FC tan a inlan tawh bawk. Player dang tan MPL4 Qualifier hi hming chherna hun remchang a ni a, tih mai mai a thiang lo ang.
Eng nge an sawi?
Electric FC manager F. Lalhmangaihsanga (Duata) chuan, "MPL Qualifier hi a phur phur khelh a ni bik lo a, Aizawl DFA first division hnuaia che ṭha tan chauh hmun a awm. Qualifier khel thei tura kan inhlangkai thei hi kan lawm a, MPL khelh ngei tumin theihtawp kan chhuah ang," tiin a sawi.
Jimmy L. Sailo chuan, "MPL3-ah Lunglei FC an inlan a, keini hi Lunglei khaw club ni mah ila Lunglei FC nena ngaih pawlh loh kan duh. Zotlang FC kan ni a, Mizoram Premier League khelh ngei tumin theihtawp kan chhuah ang. Aizawl DFA hnuaia club-te hi an ṭhat ka ring a, chutihrualin kan hlau bik lo tih ka sawi duh a ni," tiin a sawi.
MPL4 QUALIFIERS FIXTURES
January 16, 2014 (02:00 PM)
Zotlang FC, Lunglei Vs Electric FC
January 17, 2014 (02:00 PM)
Upper Republic FC Vs Luangmual FC
January 23, 2014
11:00 AM Electric FC Vs Upper Republic FC
02:00 PM Luangmual FC Vs Zotlang FC, Lunglei
January 28, 2014
11:00 AM Zotlang FC, Lunglei Vs Upper Republic FC
January 28, 2014
02:00 PM Electric FC Vs Luangmual FC