Conte hma hun a chiang lo

"Pahnihna nih hi chu ka tan awmzia a awm ve lo," tiin Inter Milan manager Antonio Conte-a'n Serie A chungchangah a sawi tawh a, tunah pahnihna dinhmun bawk an luah leh. Italian manager hian season tharah Inter a enkawl chhunzawm dawn em tih a chiang ta lo.

Kum 51 mi Conte chuan, "Ni tlemte ka chawl phawt ang a, chumi hnuah rilru fim takin club President nen kan inhmu ang, ka ngaihdan ka sawi ang a, ani pawhin a sawi ang. Thil thlirlet tur tam tak a awm," a ti. Inter Milan president Steven Zhang nen thutlukna an siam ang.

Chinese sumdawng hausa Zhang hian Conte chelh tur chuan player lei nan sum ṭhahnem tak a tiam a ngaih a rinawm, chutihrualin thlawpna ṭha leh thuneihna sang zawk a beisei a rinawm bawk.

Final thlirkirin Conte chuan, "Kan khel chhe loah ka ngai, chak leh chak loh hi chu football-in a ken tel thil a ni. Player naupang theihna nei sang tak tak kan nei a, tunah hlawhtlinna chang nghal lo mah ila nakin atan hmabak a êng hlein ka hria.

"Kan duh leh beisei ang vekin infiamna khawvelah chuan thil a thleng thei lo, hei tak hi infiamna ropuina leh mawina chu a ni si," tiin a sawi. Inter president Zhang chuan an manager leh player ten hna an thawh ṭhat thu a sawi ve bawk.