MPL Under 17 Semi final-ah Aizawl FC leh Dinthar

Mizoram Premier League khelh mekah Aizawl FC leh Dinthar FC chuan game hnih khelhah point ruk ve ve an hmu tawh a, semi final an lut.

Nimina RG Stadium, Mualpuia Group B inkhelah Aizawl FC-in Reitlang FC 4-1 in an hneh a, Dinthar FC-in Bethlehem Vengthlang FC 5-2 in an hneh bawk. Group B-ah hian Inrinniah Aizawl FC leh Dinthar FC-in group hmahruaitu nih an inchuh ang a, tla tawh pahnih Reitlang FC leh Bethlehem Vengthlang FC-te an inkhel bawk ang.

Nimina inkhel hmasa zawkah Aizawl FC tabn Lalbiakfela'n minute hnihna lekah goal a thun a, hei hi first half-a goal awm chhun a ni. Aizawl FC-in an fitness ṭhat an chhawr leh a, second half-ah Stephen Lalnunmawia'n minute 53 leh 82-ah goal a khung a, Lalmuanzova'n minute 69-ah a thun bawk a; Reitlang tana Isac Lalremruata'n minute 67-naa a thunin awmzia a nei ta lo. Aizawl FC hian khelh hniahah goal riat thunin goal hnih an chhuah.

Inkhel hnuhnung zawkah Dinthar FC-in goal nga zet an thun a, heng zinga pathum hi Lalhmachhuana thun a ni. MPL 3 Under 17-a hattrick siam hmasa ber Hmachhuana hian minute 50, 59 leh 74-ah goal a thun a, minute 24 chhugin goal thum a khung a, BVT lamin an ngam lo a ni ber. He mi hma hian Lalawmpuia'n minute ruknaah goal a thun a, minute 43-naah a lo khung tawh bawk. BVT lam tan PC Vanlalhruaia (52') leh Lalruatkima (70') te'n goal an thun ve bawk.

Vawiin dar 11:00-ah Lammualah inkhel leh tawh tur a ni a, Chanmari FC leh Chanmari West FC an inkhel ang. Chanmari tan semi final lut turin draw a tawk a, Chanmari West FC tan chak ngei ngei a ṭul. Group A-ah hian khelh hniha point thum hmu Mizoram Police an awm tawh a, an goal difference chu +2 a ni a; Chanmari hian khelh khatah point thum hmuin an goal difference chu +1 a ni a, Chanmari West hian vawi khat khel tawhin point an la hmu lo a, an goal difference chu -3 a ni.