Coupe de la Ligue-ah Monaco leh Lille

Nilaini zan khan Monaco-in Dimitar Berbatov leh Anthony Martial te goal hmangin Guingamp an hneh a, Lille-in Sebastien Corchia leh Simon Kjaer te goal hmangin Nantes an hneh bawk. Coupe de la Ligue semifinal-ah Monaco leh Bastia an inkhel ang a, Lille-in champion lai Paris Saint-Germain an hmachhawn ang.

Guingamp hian Monaco an hmachhawn hma hian inelna hrang hrangah hneh loh an tawng tawh lo. Amaherawhchu Stade Louis I-ah Monaco-in hma an hruai hma a, minute riatnaa Manchester United forward hlui Berbatov-a'n Monaco hmahruaina goal a khung. Bulgarian forward hian Yannick Ferreira-Carrasco cross a tauh lut a, first half tawp hma hreta Guingamp forward Christophe Mandanne hnawhchhuah a nih zui avangin Monaco dinhmun a ṭha hle.

Monaco hian tam zawk mah se goal hnihna an khung thei lawk lo a, second half injury time-ah Martial-a'n goal hnihna khungin 2-0 in an chak.

Stade Pierre Mauroy-ah Lille-in Nantes an mikhual a, Sebastien Corchia-a'n minute kuanaah kawh zetin a pet goal a. Lille defender tan he goal hi July thla hnuaa a goal hmasa ber a ni. Lille goal hnihna pawh a mawi a, minute 69-naah Kjaer-a'n nalh takin freekick aṭangin a khung. Lille hian a zawnin match thum goal an chhuah tawh lo.