Darren Fletcher a chhuak dawn em?

Manchester United player Darren Fletcher chuan January transfer hun inhawn chhungin hian Old Trafford a chhuahsan mai thei a, sawmtu a nei nuala hriat a ni.

United tana game 342 khel tawh midfielder hi hun rei tak chhung dam loh vangin a inkhel thei lo a, tun hnaiah dam ṭha leh tawhin manager Louis van Gaal pawhin vice captain-ah a ruat. Vice captain-a ruat a nih hnuah a khel phak ta meuh lo a, December khan Michael Carrick chu vice captain-ah an dah leh ta zawk a ni.

Fletcher hian tun season tawp thleng chiah contract a nei a, contract thar an pe lo a nih chuan season tawpah a free-in a chhuak thei ang. Tun season-ah Premier League-ah ṭum nga chiah starting eleven-ah a tel phak a, hei vang hian United bencjh-a ṭhut tura contract pawhsei ai chuan, club danga kal mai hi a duh tawh an ring.

Kum 30 mi Fletcher hi tun season-ah inkhel 12-ah chiah a la inlan a, tun hma chuan player pawimawh niin Premier League champion team-ah ṭum li a tel.

United rawlthar Adnan Januzaj pawh loan-in a chhuak dawn niin a lang. David Moyes-a hnuaia United tana lawmna awm chhun ang hiala an sawi Belgian rawlthar hian LVG hnuaiah hmun a chang tlem a, ṭum hnih chiah inkhel bul ṭantu a ni phak. Kum 19 mi winger ball thiam tak hian tun season-ah game hnih chiah a la khel tluan a, season hmasaa game 35 khel tan chuan a tlem hle a ni.