Tottenham-in comeback ropui lantir

Nilaini zan khan Burnley-in mualneitu Tottenham Hotspurs lakah 2-0 in hma an hruai a, Spurs hian an siphurh an sut bakah goal hnih dang khung belhin 4-2 in an chak.

FA Cup third round replay inkhel dangah kar tawpa Manchester United hnehtu Southampton-in khualmualah Shane Long-a goal hmangin Ipswich an hneh a, Bradford-in Milwall 4-0 in an sawp bawk.

White Harte Lane-ah chuan...

Burnley-in an beisei phak baka ṭhain bul an ṭan a, minute thumna lekah Marvin Sordell-a'n a pet goal nghal a, minute nga hnuah Ross Wallace freekick pet chu an khawih per hnuah a goal bawk. Burnley ṭantute lawmna hi Spurs ṭantute tan thilmak a ni a, Mauricio Pochettino leh a team-te hmabak a ko hle.

Burnley an fimkhur tawk lo a, an inthlahdah hma hret avangin minute 10-naah goal an chhuah nghal. Goal khungtu hi Brazilian midifielder Paulinho a ni a, Spurs tiphurtu goal pawimawh a ni. Mual neitu Tottenham an che ṭha chhunzawm a, Burnley tlar hnung tan Spurs winger Andros Townsend a hnawksak hle.

Spanish forward Roberto Soldado-a'n an siphurh sut theihna chance ṭha a hlah a, first half tawp hma hretin an siphurh an sut a. Etienne Capoue-a'n yard 20-na aṭangin a pet goal a, 2-2 in first half a tawp.

Second half-ah team ṭha zawk Spurs an che ṭha chhunzawm a, inkhel an thununna kawngah Paulinho a ṭangkai hle. Minute 49-naah Brazilian midfielder corner pet chu Burnley keeper Tom Heaton-a'n a ban phak lo a, Vlad Chiriches-a'n goal-ah chantir.

Minute thum hnuah chak tur a chiang a, Soldado cross chu Danny Rose-a'n a pet goal a, 4-2 a ni. Darkar chanve lai hun la awm mah se goal dang a luh belh tawh lo a, Spurs hian FA Cup fourth round-ah Leicester City an hmachhawn ang.

Eng nge an sawi?

Tottenham manager Mauricio Pochettino chuan, "FA Cup khelh zel hi kan phu a ni. First half-a kan siphurh kan sut hman kha a pawimawh viauin ka hria. Goal chhuah hma mah ila ka player-te an huaisenna an lantir a, chu chu kan chakna chhan pawh a ni," tiin a sawi.

Burnley manager Sean Dyche chuan, "Chak tumin kan khel a, amaherawhchu kan tihsual vangin kan chak lo. Tun season-ah thil tam tak kan zir tawh a, chutihrualin Spurs lakah erawh kan tisual tam hret a ni," tiin a sawi.

Saints an tlang ta

St Mary's Stadium-ah Southampton leh Ipswich Town 1-1 in an hnehtawk a, Portman Road-ah chak zawk an awm ta. Premier League club Southampton an chak.

Nilaini zanah Ipswich Town-in goal an khung hamsa a, amaherawhchu Stephen Hunt goal chu offside vangin pawm a ni lo. Inkhel nung ta a ni lo a, team pahnih goal bawh a na lo ve ve a, an danglamna chu Shane Long a ni. West Brom forward hlui hian minute 19-naah class takin a khung a, he goal hi Saints kal zel nan a tawk.

January 24 hian Saints hian Premier League club Crystal Palace an hmachhawn ang.

Eng nge an sawi?

Ipswich boss Mick McCarthy chuan, "Chak loh hi chu a hreawm ṭhin. Keeper pahnihin hna an nei lo ve ve a, tun aia ṭha khan khel thei mah ila keini aiin Southampton kha an ṭha zawk a ni," tiin a sawi.

Southampton boss Ronald Koeman chuan, "Inkhel kan la thutak a, kan chance neih hmasak bera goal kan khung kha kan vannei a ni," tiin an khelh ṭhat bik loh thu a sawi.