Tennis Round Up

Wimbledon player a nih aṭanga kum 60 zet ral hnuah Margaret Fisher chuan Australian over 80's tennis champion nih ngei a tum.

Fisher hian kum 2013 khan tennis khawvel a rawn luh chilh leh a, Turkey-a a World Super Senior Tennis Championship-ah kum 80 chunglam team-ah Australia tan captain a ni.

2015 Australian Senior Championship khelh mekah kum 84-a upa Fisher hian champion ngei a la in beisei a. Kum upa tawh tak ni chungin tennis khawvelah sulhnu ṭha hnutchhiah a la tum tlat a ni.

Spanish star Rafael Nadal chuan Mark Philippoussis chu Fast4 Tennis exhibition match, Melbourne-a khelhah a hneh.

Nadal hian minute 15 chhung lekin a khingpui hi 4-1 in a hneh a. He match hi Margaret Court Arena, Australian Open khelhna tur official-a hawnna ceremony in a zui a ni.

Tennis dan thar hnuaia khelh Fast4 tournament hi Tennis Australia (Australia rama tennis thuneitu sang ber) te duanchhuah a ni a. Tennis dan pangngaiah chuan set khatah game ruk tal lak a ngai a, Fast4 tournament-ah erawh set khatah game li lak a tawk thung. Fast4 tournament hi cricket-a twenty20 te nen khaikhin theih a ni.

Apia Sydney International khelh mek a ni a, quarterfinal-ah Daria Gavrilova chuan Angelique Kerber a hneh.

Hmeichhe inelnaa seeded pangana German player Kerber hian 6-7 (6-8), 7-6 (7-2), 6-3 in Russian player Daria a hneh. Sydney-ah ruah a sur nasat avangin inkhel kar lakah chawlh a awm a, inkhelh zawh a nih meuh chuan an local time-ah zing dar 3:10 a ri tawh a ni.

Apia Sydney International mipa inelnaah Juan Martin Del Potro a chak a, Sergiy Stakhovsky a hneh.

Nikum February-a inhliam hnuah kum 26 mi Del Potro tan Apia Sydney International hi a inelna hmachhawn lehna hmasa ber a ni a. Semifinal thleng turin Sergiy hi 6-3, 7-6 (7-4) in a hneh. 2009 US Open champion hian top seed Fabio Fognini a hmachhawn ang.

2015 Heineken Open-ah Kevin Anderson chuan semi-final a thleng ta. Seeded palina Anderson hian a khingpui American Steve Johnson chu minute 96 chhungin 6-4 7-6 in a hneh.

South African player Anderson hian Czech player Jiri Vesely chu semi-final-ah a hmachhawn dawn a. Tournament hi Auckland, New Zealand-ah khelh mek a ni a, January 17-ah final khelh tur a ni.