Chona thar phûrawm tak a ni - Bony

Manchester City striker thar Wilfried Bony chuan club thar a zawm chu chona thar hmachhawn tur a nih a inhria a, huphurhawmah ngai loin phûrawm a tih thu a sawi.

Swansea tana khelh 70-a goal 34 thuntu chuan, "Swansea hi ka ngai dawn a, a khaw mipuite an ngaihawm dawn ngei mai; nimahsela chona thar hmachhawn tur ka ni a, a phûrawm a, ka nchâk tawh hle a ni," a ti.

A club hlui chu nuam a tih thu sawi chhuakin, "Swansea mipui zawng zawng chungah ka lawm a, ka ṭhiante, kan coach, medical team, kan bungraw enkawltute aṭanga kan chairman thlengin an chungah ka lawm a, lawmthu sawina tur ka ngah khawp mai. Ka dah pawimawh ber chu fans an ni a, ka luh tirh ni aṭangin min ṭan tlat a, hun harsaah pawh min phatsan lo a, Liberty khelmuala ka hming lama an zai ṭhin hi ka tan chuan a hlu takzet a ni," tiin a sawi.

Bony chuan Holland aṭanga England-a a luh dawnah sawmtu tam tak nei chunga Swansea a thlang chu tifuh a inti a, "Swansea ka pan kha ka kalna tura ṭha berah ka ngai a, inchhiarna tur pakhatmah ka nei lo. Tunah erawh tawnhriat zau zawk nei turin ka chhuak dawn a, Champions League khelha champion nomawi dawn ngei ka tum dawn a ni," a ti.