Australian cricketer Brett Lee a chawl ta

Australian fast bowler Brett Lee chuan Sydney Cricket Ground-ah nimin khan cricket a chawlhsan thu a puang chiang ta.

Kum 38-a upa Lee hian hun rei zawk cricket khelh a duh avangin July 2012 khan ram tana khelh a chawlhsan a. Australian cricketer zingah Brett Lee hi Test wicket la hnem ber palina a ni a, match 76-ah wicket 310 a la.

Lee chuan "Hun ropui leh chhinchhiahtlak tak tak kum 20 kalta chhung khan ka tawng a, cricket-a ka hun hman zawng zawng hi ka tan chuan hlimna tur hlir a ni,"tiin a sawi.

Australian cricketer ropui hian inkhelh chawlhsan thu puang tawh mah se khelh hmabak a la nei a; January 22, Ningani khian Big Bash League-ah a khelhna Sydney Sixers tan a inlan ang a, professional cricket a khelh hnuhnun ber tur a ni.

Australian circketer zingah Shane Warne, Glenn McGrath leh Dennis Lillee te chauh Brett aia test wicket la tam an awm.

Lee chuan a chawlh tur chungchang sawiin "A hlimawm rual rualin hun kal ta te rilruah a awm reng a, ka ngai dawn khawpin ka hria. Ka thutlukna hi a hun takah ka siamah ka ngai a, chu chuan min ti lawm a ni," a ti.

Kum 1990 aṭanga 2000 chhung khan Australia cricket team-in cricket khawvelah rorel an rel a, khatih hunlaia player pawimawh chu Brett Lee hi a ni. Cricket World Cup 2003-a Australia an champion khan a tel a. Ashes series ṭum li khelhah vawi thum a inlan a, Ashes hi England leh Australia te inkara test series a ni a, ram pahnih hian he inelna hi an ngai hlu hle.

Lee chanchin tawi

Nov 8, khan 1976 Wollongong, New South Wales-ah a piang.

Brett Lee hi 'Bing' tiin an ko ṭhin.

Kum 1996 khan Test match hmasa berah India a hmachhawn a, a he match-a a record chu 5-47 a ni.

2003 khan World Cup final-ah Australia-in India runs 125-a an hneh ṭumin wicket a la.

Kum 2006 khan Wisden Cricketers of the Year mi panga an thlan chhuahah a tel.

2006 khan ICC Test leh ODI team of the year-ah thlan a ni.

2007 khan Ashes-ah Australia-in England chu 5-0 in an hneh a, player pawimawh a ni.

2008 khan Allan Border Medal for Australia's player of the year a dawng.

ODI career:380 wickets, average 23.36, 221 matches

Test career:310 wickets, average 30.81, 76 matches

T20 career:28 wickets, average, 25.50, 25 matches