McGregor tak tak kan hmu leh ta

UFC khel tura mi bik Conor McGregor chu nimin zing khan a ropui tawhna ṭhin octagon-ah a rawn kir leh a, tun hma lama fight hmuhnawm lantir tawh ṭhintu hian Donald 'Cowboy' Cerrone chu second 40 chhung lekin a hneh.ṭ

T-Mobile Arena, Las Vegas khawpuia UFC 246-ah American mi tam takin Donald Cerrone an ṭan, an hmuh châk erawh McGregor a ni. Irish tlangval hian bawh pahin a kut vei lamin a vai nghal a, fuh chiah lo mah se a dar hmangin ṭum hnih a tauh nghal. McGregor-a chet dan danglam tak chuan Cowboy-a lu a ti hai der a, second 20-na velah McGregor hian a ke vei lamin a luah chiang taka pet fuhin a bawhchilh nghal a, mipui 19,040 au ri hulh hulh karah a hnek tlawm zui der!

Kum 31 mi McGregor chuan, "Sulhnu ropui ka siam, UFC fighter zingah featherweight, lightweight leh welterweight huanga knockout hmanga hnehna chang vek thei awmchhun ka ni, ka thil tih hi ka chhuang hle," a ti. 

An inbeih hmain McGregor hian knockout a tum thu a sawi a, hun a hman chen tur erawh a sawi lo. Second 40 chauh la ni mah se referee Herb Dean chuan fighter pahnih dinhmun a hrechiang a, inbeihna a titawp. McGregor hian 2018 October thla khan Khabib Nurmagomedov a ngam lo a, Russian tlangval a hneh loh hnua UFC a khelh lehna hmasa berah a che ṭha hle; 2016 October thla a world title a lak hnuah tun ṭum hi UFC-a hnehna a chan lehna hmasa ber a ni bawk.

A hmuna entu zingah welterweight champion Kamaru Usman leh veteran fighter Jorge Masvidal te pawh an tel a, anni pahnih hian an en uluk hle. A tu emaw zawk hi McGregor-a'n a hmachhawn leh theih tur zinga mi an ni. A hma hun sawi zuiin McGregor chuan, "Tu pawh an ni thei, hei erawh ka chiang. Fight hmachhawn turin ka inpeih a, ka inpeih leh tawk tawh a ni," a ti. Boxing ring chhungah ropui lo mah se octagon-ah erawh a la ropui hle. UFC 246 fight dangah Holly Holm-i'n unanimous decision-in Raquel Pennington    a hneh a; Aleksei Oleinik, Brian Kelleher leh Carlos Diego Ferreira ten submission-in an khingpui ṭheuh an hneh bawk.