Madrid derby-ah Atletico an chungnung El Nino is back!

'El Nino' tia Atletico Madrid fans-in an koh ṭhin, an âtchilh leh an player ṭan ber chuan Atletico Madrid kawr a ha leh ta a, Real Madrid khelmualah goal hnih a thun - Fernando Torres-a goal hmangin Atletico-in Real Madrid chu King's Cup aṭangin an hnawtchhuak.

Ningani zana Bernabeu-a inkhelah hian Torres hian a ball khawih hmasak berah goal a thun nghal a, second half ṭan chiahah goal a thun bawk. Real tan Sergio Ramos leh Cristiano Ronaldo-te'n goal khat ve ve thunin he inkhelah bik hian 2-2 in an inhnehtawk a; nimahsela Atletico hi an khelmualah 2-0 a an lo chak tawh avangin belhkhawmin 4-2 in an chak a, quarter final an lut.

Quarter final-ah Barcelona an tum dawn a, anni hian Ningani zan khan Elche chu 4-0 in an hneh a, inkhel hmasa nen belhkhawmin 9-0 in an chak. Barca tan hian player ṭhate an inlan mang lo a, goal thuntute chu Jeremy Mathieu, Sergi Roberto, Pedro leh Adriano-te an ni.

El Nino chu le

Torres hi 'El Nino' tiin Atletico-a a awmlaiin an ko ṭhin a, chu chu 'The Kid' tihna a ni. He 'mipa naupang' hi a naupanlai aṭanga Atletico tana khelh duh tawh, a pu aṭanga Atletico ṭantu chhungkuaa mi kha a ni a, naupang tê a nihin Atletico academy a zawm.

Atletico-ah hian kum 11 mi niin a inziak lut ṭan a, an academy naupang duhawm ber zinga mi a ni. Kum 15 a nihin Atletico lamin professional contract an ziahpui der tawh a, kum 17 mi a nihin he club first team-ah a khel ṭan. Kum 19 mi lek a nihin Atletico captain-ah an ruat a, he club captain ni tawha naupang ber a ni.

Club lian tam tak sawmna a hnar hnuah kum kum 2007 khan Liverpool a pan. Atletico Madrid tan khelh 214-ah goal 82 a thun hman.

Atletico-ah a hlawhtling a, Liverpool-ah a hlawhtling chhunzawm a, Chelsea-a a mualpho hnuah Milan a pan - Milan-ah thla li chhungin goal khat chiah a thun hman a, Atletico-a a kir hnuah goal a thun ta - chu chu Real Madrid goal-ah a ni!

Real hmelma Torres

Torres hi Madrid naupang a ni a, Atletico a ṭan em avanga Real haw hlur mai a ni. Atletico-a a chet ṭhat avangin rawlthar a nihlaiin Real lama kal mai tur angin an sawi hman a, chutah chuan, "Atletico mi leh sa ka ni a, ka dam chhungin Real Madrid tan hian ka khel lo ang," a ti ngat!

Real tana a khelh duh loh thu sawi pâng pâng mah se Torres-a hunlaiin Atletico hian Real Madrid an hneh thei ngai lo. Hei mai hi a ni lo, Torres hian Madrid derby-ah goal khat pawh a thun thei lo a, hei vang hian Real fans lamin an nuihsawh a, Madrid derby-ah Torres-a nuihsawhna hlate an sa hial ṭhin.

Real an hneh loh avanga rilru nâ a ṭah chhuah châng pawh a awm a, an khaw club pakhat zawkin an hneh reng mai chu hrehawm a ti a, chu record chhe tak nen chuan Madrid khawpui a chhuahsan.

Tunah, a tlakchhiat tawh lamah Atletico kawr ha turin a kir a, hei pawh hi AC Milan-in an duh tawh loh vang a ni ber a; nimahsela Torres hian a vanglaia a tih theih ngai loh a ti a, Real goal-ah a thun a, chu chu Barnebeu khelmualah a la ni zui - amah a lawm a, fans an lawm a, an zavaiin an lawm - Real tan erawh a na viau ang.

Ronaldo chungah Torres!

Ningani zan inkhel hi Real Madrid-in Ronaldo award an lawm zan a ni. World Player of the Year chawimawina nen khelmual a lut a, mipui an ri hum hum mai. Hei mai hi a ni lo, World XI-a tel Real player Toni Kroos leh Sergio Ramos pawhin an chawimawina dawn an keng lut a, goal nalh ber thuntu James Rodriguez pawh a inlan a, inkhelh hmain Real fans thawm a ring hle.

An inkhel ta a, minute khat pawh an khel hman lo, second 48-naah Torres chuan Antoine Griezmann ball pek a khung. Minute 20-na a ni a, goalkeeper Jan Oblak tihsual vangin Ramos chuan an si phurh a sût a, he mi hnu hian Real-in inkhel an thunun a, goal erawh an thun thei mai lo.

Second half-ah Real-in ṭan an lak theih hmain Torres bawk a lo lang a, minute 46-naah a khung leh ta a, Griezmann-a siamsak tho a ni. Minute 54-naah Ronaldo chuan hei hi sût leh mah se, Real-in goal an thun belh thei tawh lo - Ronaldo chawimawi zanah Torres a langsar zawk.

El Nino chuan, "Goal ka la khung ngai lohna khelmuala goal ka thun hi ka lawm a, ka tan chuan ni lawmawm tak, hriatrengtlak a ni," a ti.