Australian Open Fixtures a chhuak ta

2015 Australian Open draw chu nimin khan tihchhuah a ni a, tennis inelna Grand Slam hmasa ber hi Melbourne khawpuiah January 19 aṭanga ṭan tur a ni.

Melbourne-a draw neihnaah hmeichhe champion lai Li Na a tel a, Asian hmeichhhe zinga Grand Slam title la thei hmasa ber Chinese star hian tennis khelh a chawlhsan tawh avangin kumin hian champion thar an awm dawn a ni.

Mipa champion Stanislas Wawrinka hi draw neihna hmunah a awm a, Swiss player Wawrinka hian match hmasa berah world no. 99 Turkish player Marsel Ilhan a hmachhawn ang.

Nikuma runner up leh 2009 Australian Open champion Rafael Nadal-a'n Russian star world no. 47 Mikhail Youzhny a tum dawn. Grand Slam inelnaa pawisa tamna ber US Open-ah kum 2006 khan quarterfinal-ah Youzhny hian Nadal a lo tlawm tawh a ni.

Kum 25-a upa Juan Del Potro chuan a match hmasa berah Pole Jerzy Janowicz a hmachhawn dawn. Spanish player Del Potro hian Australian Open inpuahchah nan Apia Sydney International-ah a tel a, nikum February thlaa a inhliam hnuah a inelna tel lehna hmasa ber a ni. Del Porto hi Australian Open-ah ṭum hnih quarterfinal a lut tawh a, 2009 US Open-ah a champion tawh bawk.

First round-a World no. 1 Novak Djokovic-a hmachhawn tur hriat a la ni lo, Serbia star hian qualifier zinga pakhat a tum ang. Djokovic hian ṭum li lai Australian Open-ah title a la tawh a, Grand Slam title dang pathum a la tawh bawk.

Roger Federer-a'n Taiwan player kum 31-a upa Lu Yen-hsun chu a match hmasa berah a khel ang. Swiss player hian Australian Open ṭan hma hian Brisbane International inelnaah a champion a, a career match 1000-naah nomawi a chawi a, inrintawkna nen Grand Slam inelna hmasa ber hi a khel dawn a ni. Federer hian Australian Open nomawi ṭum li a chawi tawh a, Grand Slam title dang 13 zet a la tawh bawk.