MPL4 Qualifier-ah Jerry Zirsanga?

Vawiin chawhnu dar 2:00 hian Lammualah Luangmual FC leh Upper Republic FC te'n Mizoram Premier League Season 4 Qualifier an khel dawn a, Luangmual FC hi MPL2 finalist kha an ni.

Luangmual FC-in season khat chhung hrem an nih hnuah MPL khelh leh ngei an tum a, player ṭhahnem tak an lak luh zingah Jerry Zirsanga a tel. TATA Football Academy chhuak Jerry hi Malsawma leh Valalrova te nen Mizo Trio tihin an lar a, Rova hian MPL1-a a enkawl Luangmual FC a rawn enkawl leh dawn.

Luangmual FC-in inkhel hmuhnawm lantir thei turin player ṭha la lut mah se an khingpui tur Upper Republic FC an zam bik lo. Aizawl DFA hnuaia season opening champion Upper Republic hian player chhuan tur khawpa langsar an nei lo.

Chutihrualin tlar hnung tichaktu captain Lalremtluanga leh forward Lalruatpuia te hian football khawvela hming chher turin theihna an nei tih a chiang.

Aizawl DFA Mid Season tournament group stage-ah Luangmual hian Upper Republic hi 5-1 in an sawp a, tun ṭumah erawh he result hi a pawimawh tawh lo.

Eng nge an sawi?

Uppper Republic FC manager R. Lalhrilliana chuan, "MPL Qualifier khel tur chuan kan inpeih tawh chuan ka hria. Season tir lam nen khan kan danglam lo a, amaherawhchu training ṭha zawk ka neih avangin tawh kan khirh sawt ang. Luangmual hian Mid Season inelnaah 5-1 in min sawp a, kan hneh leh hneh loh chu thuhran nise, kan tum chak tawh khawp mai," tiin a sawi.

Luangmual FC manager Lalṭhazuala Sailo chuan, "Squad aṭanga thlir chuan kan ṭha khawpin ka hria. Kan veng chhung aṭanga phai lama khel player kan la lut nual a, veng pawn aṭangin player ṭha kan la lut bawk. Amaherawhchu, duhthusamin practice-na hun kan nei thei lo," tiin a sawi.

An khingpui tur chungchang sawi chhunzawmin, "Upper Republic hi team ṭha tak an ni a. Aizawl DFA first division season opening champion thei an ni a, Halflong aṭangin champion nomawi an rawn hawn thei bawk. Chesual thei chu kan ni a, champion nomawi pahnih an chawi zawh hian Mid Season Tournament-ah 5-1 in kan hneh a, tuna kan player-te hi an la ṭha cheu bawk," tiin a inrintawk thu a sawi.

Mipui chungchang sawiin Ṭhazuala chuan, "MPL khelh leh kan duh a, kan mamawh chu mipui ṭawiawmna a ni. Kan inkhel en ngei turin kan supporter-te kan sawm a, mawi taka khawsa turin kan ngen nghal bawk," tiin a sawi.

MPL4 QUALIFIERS FIXTURES
January 17, 2014
02:00 PM Upper Republic FC Vs Luangmual FC
January 23, 2014
11:00 AM Electric FC Vs Upper Republic FC
02:00 PM Luangmual FC Vs Zotlang FC
January 28, 2014
11:00 AM Zotlang FC Vs Upper Republic FC
January 28, 2014
02:00 PM Electric FC Vs Luangmual FC