Juventus-in Verona an sawp

Coppa Italia last 16 patlang Juventus-in harsatna an nei lo a, anmahni khelmual Juventus stadium-ah Hellas Verona 6-1 in an sawp. Serie A champion lai hian quarterfinal January 28-a khelh turah Cagliari hnehtu Parma an hmachhawn ang.

Ningani zan inkhelah entu an ṭhahnem a, mipui 40,000 pungkhawm hmaah Sebastian Giovinco-a'n freekick aṭangin minute ngana lekah Juventus hmahruaina goal a khung. Midifielder Paul Pogba-a ball pet Verona keeper Rafael-a'n dang mah se minute 21-naa Roberto Pereyra chip ball erawhin Verona keeper hi a khum mawi hle. First half tawp hma hretin Giovinco-a'n goal hnihna a khung a, Juventus 3-0 in hma an hruai. Second half-ah pawh Juventus an chungnung chhunzawm a, Pogba-a'n minute 51-naah goal lina a khung a, chak tur a chiang.

Verona forward Nene-a'n minute 57-naah goal khung ve mah se Juventus-in Alvaro Morata penalty leh Kingsley Coman te hmangin goal hnih dang an khung belh a, 6-1 in inkhel a tawp.

Hellas Verona coach Andrea Mandorlini chuan, "Team ṭha lakah kan nem lutuk a, tihsual kan ngah lutuk a, chu chu kan chak lohna chu a ni. Pathianni chuan result danglam tawh ngei ka ring," tiin a sawi.

Pathianni zan hian Serie A-ah Juventus leh Hellas Verona te Juventus Stadium-ah bawk an inkhel leh ang.