Bundesliga aia harsa zawk Bayern training - Muller

Bayern Munich forward Thomas Muller chuan an club training chu Bundesliga inkhel aia a harsat zawk thu a sawi.

Bayern hian Doha-ah mid-season training camp an nei a; Pep Guardiola enkawl Bayern hian tun season-ah Bundesliga, DFB-Pokal leh UEFA Champions League-ah an la champion thei vek.

Muller chuan, "Kan training kalphung hi a sang a, kan defender-te hi an ṭhat avangin Bundesliga club dang aiin hmachhawn an harsa zawk. Inelna harsa tak kan la hmachhawn zel dawn a, March leh April thlaa kan khel turte hi a pawimawh leh zual dawn. Champions League title hi lak a awlsam dawn lo tih ka chiang," tiin a sawi.