MPL4 Qualifier Zotlang FC leh Electric FC an inhnehtawk

Mizoram Premier League Season 4 Qualifier inkhel hmasa ber chu nimin khan khelh a ni a, goal awm loin Zotlang FC, Lunglei leh Electric FC te an inhnehtawk.

Nimin tlai Lammualah inkhelah Lunglei khaw club Zotlang FC an chungnung hret a; amaherawhchu an khingpui Electric FC nen goal an khung thei lo.

Electric FC midfielder Lalbiaktluanga'n goal khung ngeina tura ngaihah a hlah a, Zotlang forward Vanlalhlua'n first half-ah chance ṭha a hlah ve bawk.

Second half a danglam chuang lo, team pahnih khelh dan a rorum a, goal erawh an khung thei lo ve ve. Electric FC forward Vanlalhmangaiha'n goal khung nan a tawn hriat a hmang ṭangkai thei lo.

Electric keeper Benjamin HT Hluna leh Zotlang forward H. Remlallawma-te chu an insut nat deuh avangin lak chhuah an ngai ve ve a, Zotlang lamin substitution an hman zawh tawh avangin player 10-in an khel.

Tlem zawka khel chungin Zotlang goal bawh a na reng a, left back C Lalruatmawia'n hun tawp hma hretin goal ngei tura ngaih a hlah a, Electric FC an him hram.

Zotlang FC hian karleh Zirtawpni tlai dar hnih hian Luangmual FC an hmachhawn ang a, hemi ni vek chhun dar 11:00 hian Electric FC leh Upper Republic FC te an inkhel bawk ang.

Eng nge an sawi?

Electric FC manager F Lalhmangaihsanga (Duata) chuan, "Chance ṭha vawi hnih kan nei a, khung ila chuan inkhel result a dang ang. Ngaihtuah let pawhin kan chance hlah kha chu kan ui khawp mai. Chutihrualin thil kal tawh chu a siamṭhat theih tawh loh, karleha Upper Republic kan hmachhawn hunah chuan game ṭha leh mawi zawk kan lantir theih ka beisei. Kan player-te khelh danah kan lungawi a, uluk zawkin inpuahchahna kan kalpui chhunzawm ang," tiin a sawi.

Lunglei FC coach Jimmy L Sailo chuan, "Goal sarih vel khung theihna tur chu kan hlahin ka hria, kan vanduai a ni. Electric Veng hi veng ang pawhin inkhelh thiam an ni a, field chhungah an danglamna a lang ṭhin. Kan player-te khelh chhuah dan kha a lawmawmin ka hria a, result ṭha zawk kan neih tawh ka beisei," tiin a sawi.