Chanmari Chak Chiang

Mizoram Premier League Under 17 khelh mekah nimin khan Chanmari FC chuan Chanmari West FC chu 7-0 in an hneh a, semi final an lut.

Lammuala chawhma lama inkhelah Chanmari FC hian an ṭhenawm team hi kawng engkimah an hneh zawk a, chu chu a goal lut zatah a lang. Chanmari FC tan Sawmzela leh Ṭhasiama'n hattrick an siam a, Lalrambuatsaiha'n goal khat a thun bawk. Sawmzela hian minute 22, 23 leh 65-ah goal a khung a, Ṭhasiama hian minute 27, 29 leh 86-ah goal a thun bawk a ni.

Chanmari hian khelh hniahah point ruk hmuin Group A hmahruaitu an ni a, Mizoram Police-in point thum hmuin pahnihna an ni a, pathumna Chanmari West FC-in semi final an lut zo ve ta lo a ni.

Vawiin hian group B lam chinfel ni a ni dawn. Group B-ah hian semi final lut chiang tawh Dinthar FC leh Aizawl FC-in dar 10-ah Group B hmahruaitu nia semi final-a Mizoram Police tumtu nih an inchuh hmel a, a chak lo zawkin Chanmari FC chu semi final-ah an hmachhawn ang. Dar 12:00-ah beisei nei tawh lo Reitlang FC leh Bethlehem Vengthlangte an intum ang.