Football Fives World Championship In ṭhianhoin India aiawhin Dubai-ah football in khel thei!
Khawvel ram hrang hrangte inelna Football Fives World Championship - India khelhna turah Mizoram chu thlan tel a ni. Aizawlah 'panga leh panga' football inkhelhna hi January 29 leh January 30, 2015-ah khelh a ni dawn a, a duh apiang tel theih a ni.
Aizawla nghah tur 'Football Fives World Championship - India' hi Mizoram Football Association-in a thleng dawn a, SPT Sports, Bangalore nen ṭangkawpa an buatsaih tur a ni.
Football Fives World Championship
‘Football Fives World Championship' hi Dubai-a neih tur a ni. Hetah hian khawvel ram hrang hranga ‘Football Fives Championship’ an buatsaiha a tiṭha berte an inel ang.
‘Football Fives World Championship'-a India aiawh tur thlanna hi neih tur a ni a, chu chu Aizawla an neih tur hi a ni. Aizawl chauh ni loin India ram khawpui dang Guwahati, Bangalore leh Mumbai-ahte neih tur a ni. Heng khawpuia an inkhelh kual hnua a tiṭha ber ṭheuhte hi Bangalore-ah kal khawmin an inel leh ang.
Bangalore-ah hian India rama a che ṭha team-te March, 2015-ah an inel ang a, chuta champion chu India ram aiawhin Dubai-ah an kal dawn a ni. Dubai-ah hian ram 48 aṭanga pakhatna ṭheuhte an inkhel dawn a, April, 2015-a neih tura ruahman a ni.
He inelna ang chu hi khawpui hrang hrangah buatsaih ṭhin niin lawm a hlawh hle a, tel man (entry fee) pawh sang tak tak lak ṭhin a ni a, tun ṭumah pawh hian khawpui dangah chuan entry fee hi Rs 3,500 zel tur a ni. Mizoramah bik chiah a vawi khatna a nih angin entry fee hi Rs 500 a nih tur thu SPT Sports lam chuan an sawi.
SPT Sports leh MFA
Bangalore-a hmunpui nei, SPT Sports Management Pvt. Ltd hi India rama sports management lama a hmasa ber pawl an ni a, 1992 khan SPT Sports hi an din ṭan. Infiamna hrang hrang enkawlin ṭan an lakpui a, Bangalore bakah Assam leh Delhi-ah pawh an inbun a, football, golf, cricket academy-te an enkawl ṭhin a ni.
SPT Sports leh MFA ṭangkawp hian kum 2011 khan Mizoramah British coach chah chhuakin Hugh Lewis, UEFA 'A' License coach hnuaiah Mizo coach-te'n training an lo nei tawh. Mizoram Premier League din a nih dawn khan MFA lam chuan SPT Sports hi be rawnin an thurawn lak a ni a, SPT Sports dintu leh a neitupa Amit Saran chu Aizawlah lo kalin thurawn pawimawh tak tak a pe a ni.
Tun ṭumah hian Mizoram chhunga Football Fives World Championship - India khelhna turah SPT Sports leh MFA chu a thawk dun leh dawn a, January 29, 30-ah Lammualah he inelna hi buatsaih a ni ang.
A duh apiang tel theih
Football Fives World Championship - India-ah hian Mizoram Premier League player-te an tel thei dawn lo a, a bak zawng chu a duh apiang tel theih a ni. A tel tur hian tehna pakhat chiah a awm a, chu chu kum 16 tling chin tih a ni.
Football thiam deuha inngaite a intelkhawm theih a, inkhel ṭhang vak lote tan pawh 'intihhlimna' anga tel theih a ni. Khawpui dangah chuan hetiangah hian football player pangngai pawh ni lo an tel nual ṭhin a, hnathawh nei tawh kum upa deuh tawhte thlengin intihhlimna angin an tel a, hun hlimawm tak an hmang ṭhin.
Team khatah player pasarih a awm theih a, inkhelh hun chhung hi game khat minute 25 a ni a, a dan leh hrai pawh football khelh pangngai nen inang lo a awm hret hret ang.
A tel duh turte chuan January 19 aṭangin entry fee Rs 500 MFA Office-ah pek theih a ni a, hriat tur pawimawh leh registration form lak chhuah nghal tur a ni ang.