Luangmual FC are back!

Mizorama football club hlun ber pawl, Mizoram Premier League 2-a final khel phak Luangmual FC chuan MPL-a khelh leh ngei an tum - Inrinnia MPL Qualifier-a an khingpui Upper Republic FC chu 6-2 in an sawp.

Luangmual FC manager Lalṭhazuala Sailo chuan MPL-a kir leh ngei tumin Luangmual FC-in ṭan an lak thu a sawi a, khelh hnih an la neihah theihtawp an chhuah tur thu a sawi.

MPL Qualifier-ah hian club pali - Luangmual, Zotlang FC (Lunglei), Upper Republic FC leh Electric FC-te an awm. Vawi khat ṭheuh inkhelh kuala a sang berin MPL 4 an khel dawn a, Luangmual FC-in point thum an hmu a, Electric FC leh Zotlang Fc-in point khat ve ve an hmu tawh a, Upper Republic FC-in an la hmu ve lo.

Luangmual an che ṭha

MPL ṭan hma, football club-in fans pawh an neih mumal lohlaia fans nghet nei thei reng Luangmual FC hi MPL2 final-a fans chet mawi loh vanga hrem an ni a, season khat chhung MPL huangah an inkhel lo. MPL Qualifier-ah an lo kir a, an player ngai an la kawl nual a, an coach hlui Vanlalrova'n a ho leh a, player pawh an inla ṭha hle.

Inrinnia Lammuala inkhelah hian kawng tinrengah an chungnung zawk a, chu chu an goal thun zatah a lang. MPL-a kan hmuh ṭhin Jonathan Lalsangzuala chuan minute 14-naah goal hmahruai a thun a, minute 15-naah khung zuiin a tir aṭangin dinhmun ṭha takah an ding.

Half time hnaih tawhah Lalṭhazuala'n minute 41-naah a thun belh a, Vanrammawia'n minute 72-naah khung lehin Luangmualin 4-0 in hma an hruai.

He mi hnu hian Lalremtluanga (77') leh Lalruatpuia (90') te'n Upper Republic FC lam tan goal thun ve mah se, Ṭhazuala (84') leh Lalhlimpuia'n (90+5) Luangmual tan an khung ve leh tho a, 6-2 in Luangmual an chak ta a ni.

MPL an thlir e

Luangmual FC mangager Lalṭhazuala chuan MPL khel tura an tlin ngei a beisei thu Vanglaini a hrilh a, "Squad enin kan ṭha ber a, tumah huphurh kan nei lo," a ti.

Luangmual manager chuan Inrinnia an result avangin an veng mipuite an phur chhoh leh ngei a beisei thu a sawi a, "Kan inkhel lo rei deuh tawh a, boruak pawh a dai hman fu a; nimahsela tuna kan chak avang hian kan phûr chhoh leh ngei ka beisei," tiin a sawi. Luangmual FC hi MPL aṭangin relegate lo mah se, hrem an nih avangin MPL hnuhnung ber kha an khel thei lo a, qualifying round an khel ṭha leh ta a ni.

Upper Republic an hneh dan thlirin "Kan khel ṭha a, kan lawm em em rualin kha aia ṭha khan kan la khel thei a, chumi tur chuan ṭan kan la ang. Kan lama goal a luh dante kha a lungawithlak chiah lo a, insiamṭhatna tur kan la nei," a ti.

MPL Qualifier

MPL Qualifier hi January 23-ah chhunzawm leh chauh tur a ni. Club-te pawhin insiam ṭhatna hun ṭha an nei dawn a, inkhel pawh a danglam thei mai thei.

January 23-ah hian Electric FC leh Upper Republic FC an inkhel dawn a, he inkhela chak zawk tan chuan MPL Playoff (MPL Qualifier-a pahnihna leh MPL 3 pasarihna inkhel) a hnai kuar dawn a, chuvangin ADFA hnuaia first division club pahnihte hi an ṭang hle ang tih a chiang.

January 23-ah vek hian Luangmual FC leh Zotlang FC, Lunglei an intum leh dawn a; Luangmual FC tan chak chuan MPL4 an ban phakah a awm tawh dawn a ni ber ang a, Zotlang FC tan pawh chuti tho chu a ni ang.

January 28-ah MPL Qua­lifier hnuhnung ber an khel dawn a, Zotlang FC leh Upper Republic FC an intum ang a, Electric FC leh Luangmual FC an inkhel ang.