Australian Open khel lo tur Del Porto

A ban rek nat avanga hun rei tak chhung a inkhelh theih loh hnuah Juan Martin Del Porto chu a ban rek nâ avang bawkin Australian Open aṭangin a inhnukdawk.

World No. 4 hlui Del Porto hian Australia a thleng vek tawh a, mahse a ban rek a duh anga a la dam loh avangin a inhnukdawk ta a ni.

Del Porto chuan, "Kum khat zet ka chawlh hnua set nga awmna intihsiaka khelh chu ka la zuam lo deuh a ni. Ka ban rek tan a pawi thei dawn tlat. Thutlukna siam har tak a ni a, nimahsela inkhelh zel ka duh avangin indim a ngai a ni," a ti.

Del Porto hi a inhliam avangin world number 276-ah a tlahniam hman a, come back a tum laiin, inhliam vang bawkin a chawlh leh hrih a ngai dawn a ni.

A inkhelh leh theih thuai a beisei thu sawiin Del Porto chuan, "United States lamah tournament ka khelh leh thuai ka beisei. Kar hmasaa Sydney-a ka inkhel pawh kha nuam ka ti a, ka beisei phak bakin ka khel ṭha a ni. Na nei loin ka rawn kir leh ngei ang," a ti.