Mizoram Under 14 an chak hram

Coca Cola Cup National Sub Junior Football Championship-ah nimin khan Mizoram chuan an khingpui Haryana chu 1-0 in an hneh a; naktukah Maharashtra an tum leh ang.

Goa-a khelh mek Coca Cola Cup nimina inkhela goal awm chhun hi C Lalchungnunga thun a ni a; Mizo naupang duhawm tak Chungnunga Zotuitlang, Lunglei District lam mi niin ball a thiam avangin mipui lawm a hlawh ṭhin hle a, a pumruaa te deuh mah se Champhaia Northeast Zonal Round-ah pawh player langsar ber zinga mi a ni.

Mizoram hian an game hmasa berah Jharkhand an hneh lo tawh a, an khelh hmabak Maharashtra leh Kerala-te lakah an chet ṭhat a pawimawh dawn hle a ni.

Mizoram team manager Hming­sanga chuan, "Kan chaka kan lawm khawp mai. Goal thun theihna remchang dang pawh kan nei a, kan thun belh thei ta lo a ni. Tun ṭum chu kan khel pawh a ziaawm hlein kan hria a, kan game hmasa ber kha kan tisual nasa deuh a ni e," a ti.