ODI century rang ber siamtu De Villiers

Nimin khan AB de Villiers chuan ball 31 lek chhungin century a siam a, South African player hi One Day International (ODI) cricket history-a century siam thei rang ber a ni.

Nimin khan Johannesburg-a Wanderers khelmualah South Africa leh West Indies an inkhel a, South African opener Hashim Amla leh Rilee Rossouw-te'n run 247 an siam hnuah lo lutin a vaw nghek mai a, six runs ringawt pawh vawi 11 a vua. Tun hmaa ODI-a century siam rang ber chu New Zealand all-rounder Corey Anderson niin nikum khan West Indies lakah ball 36-ah century a lo siam tawh a ni.

Nimina inkhelah hian kum 30 mi De Villers hian run 149 a siam a, he mi kalkawngah hian ball 31 chhungin century hi a siam a ni.

Cricket khawvela century siam rang ber chu Chris gayle a ni a, ani hian Indian Premier League inkhelah ball 30 lek hmachhawnin run 100 a lo siam tawh a, tuna De Villiers-a record bik hi chu ODI-ah a ni.

Hei mai hi a ni lo, De Villiers hian ball 50 hmachhawnin half century (run 50) a siam bawk a, hei pawh hi record thar a ni a; kum 19 lo ding tawh Sanath Jayasuriya chu a khum a ni.