Southampton, Man United Tottenham leh Liverpool chak

Inrinni zan Premier League-ah Southampton chu Newcastle United khel­mualah chakin pathumna an ni chhunzawm zel a, Manchester United pawh harsa takin Queens Park Rangers khelmualah an chak ve bawk. Liverpool-in hma an sawn zel a, anni pawh Aston Villa khelmualah an chak a, Tottenham Hotspur-in an mikhual Sunderland chu 2-1 in an hneh.

Chelsea chak chian zanah an hnuaia awm Manchester City an inlan lo a, City hnuaia inhnaih tak taka awm team-te harsa takin an chak hlawm. Southampton hi tun hnaiah khual-mualah a zawnin vawi li an chak a, St James' Park-ah hian an player thar Eljero Elia chuan goal hnih a thun a, 2-1 in an chak.

Man United an vannei a, mumal lo taka an inkhelh hnuah lut thar pahnih Marouane Fellaini leh James Wilson-te chuan goal an thun a, 2-0 in an chak. Tottenham lamin hun tawp dawna Christian Eriksen-a goal thun an chakpui a, he mi hma hian Jan Vertonghen chuan a tir lamah goal khungin 2-1 in Sunderland an hneh. Liverpool chu Aston Villa khelmualah 2-0 in an chak a, Fabio Borini leh lut thar Rickie Lambert-te goal an chakpuina inkhelah hian hun rei tak chu an talbuai a, a tawpah point thum an hmu ta.

Inrinni inkhel dangah Crystal Palace chuan Burnley chu khual-mualah 3-2 in an hneh a, 12-naah an inhlangkai der tawh. A mawngphaha awm Leicester City an chak lo a, anni hi Stoke City-in 1-0 in an hneh a, Stoke hi 10-na an ni mek.

Koeman-a pawlte an kal zel

Southampton manager Ronald Koeman chuan, "Season ṭan hma khan khelh 22 hnuah pathumna kan nih theih ka inrin leh inrin loh min zawt ta se, fiamthu an thawh ang lekah ka ngai ang. Tunah pathumna kan ni miau a, kan point hmuh hi kan ruk khawm an ni lo a, kan khelh ṭhat vanga kan hlawh chhuah a ni," a ti a, a lawm ngei mai.

Southampton hi Newcastle United khelmualah an zin a, minute 14-na lekah goal an thun. Player thar Elia chuan James Ward-Prowse ball pek chu la pheiin a hnampui Daryl Janmaat a bum phawt a, chutah Netherlands team-a a khelhpui Tim Krul dan hman lohin a thun a, 1-0 a ni.

Newcastle hian minute 29-naah an sût zui a, Southampton defender Florin Gardos ball pet chhuak tur chuan Newcastle player Yoan Gouffran a tihper a, hei hi a goal zui a, half time-ah 1-1 a ni.

Minute 64-naah Elia bawkin thun lehin chakna goal a ni zui. Werder Bremen aṭanga loan-a an hawh hian a team thar chu 1997 hnua a vawi khatna atan St James' Park-ah a chakpui nghal der mai. Inkhelh tawp lamah Southampton striker Graziano Pelle chuan goal bar a tauh per a; Newcastle lamin handball vanga penalty hmu ngei tura an inngaih referee-in a pe lo chu an hrethiam lo hle.

Newcastle team enkawl lailawktu, an caretaker manager John Carver chuan, "Kha baka penalty chiang kha a awm chuang lo ang... thutlukna tam tak hi miin an lo bân phah tawh ṭhin a, thutlukna avangin point hloh a awm phah ṭhin," a ti - Newcastle hi an chak ta si lo a, amah hi an ban ngei a ring a, referee chu an point hmuh loh chhanah a puh tihna a ni - Alan Pardew ban hnuah Newcastle hi vawi li inkhel tawhin chak an la nei lo.

Southampton boss Koeman chuan, "Chak turin vanneih a ngai tel a, kan vanneih ṭum a ni a, chutihlaiin kan khelh dan leh kan inrem dan hi a fuh a, hei hi chu vanneih leh tihfuh thil a ni lo a, season luanin kan inrem phui ṭha ṭhin hle a ni," tiin a sawi.

United leh Falcao an buai

Radamel Falcao chu inkhel bul an ṭantir leh ngei a, goal a thun lo a, chance ṭha zet mai a hlah - ani hi Southampton an hneh loh ṭuma goal zawna vawi khat pawh an pet lohna inkhelah khan a khel phak lo.

United boss Louis van Gaal chu a la 'luhlul' zel a, 3-5-2 formation a hman chu hlawhtlinpui lo mah se a hmang chhunzawm zel a; nimahsela khawvela lang tham goal nawrtu a neihte pawhin goal hlauhawm an nei thei lo a, he formation hi United hian an hmang thiam thei lo a ang hle.

United fans lamin an dawhthei tawh lo a, an manager chu a formation thlak turin an au rual dual dual mai. Hei hi a hria nge a lo tum lawk ve reng, LVG chuan player

ṭangkai lo tak Juan Mata a la chhuak a, second half-ah Marouane Fellaini a luhtir - Fellaini hian minute 58-naah goal ṭha zet mai a thun.

Falcao erawh a la che fuh thei lo a, Angel di Maria ball cross duhthusam chu hnai set sawtah a tauh goal lo a, goalkeeper Robert Green a chet ṭhat ai mahin a tauh fuh tawk lo a ni ber - hei lo pawh chance ṭha dang a hlah. Hun tawp dawnah United rawlthar Wilson chuan goal thunin United hi an thla a muang ve ta chauh a, minute 90 chhung erawh an hahchawl thei lo a ni e.

Pa induhtawk ve tak mai LVG chuan, "A tirah pawh 4-4-2 a khelh hian ball kan chang tamin kan nawr na zawk dawn tih ka hria a; nimahsela min nawr lêt ve nghal zel a, 4-4-2 a nih chiah khan QPR pawhin chance an nei ta a nih kha... engpawhnise a inkhel tur mil zelin position hi kan siam fel ṭhin," tiin 3-5-2 formation chu paih tumna a la nei lo.

United fans zawkin an ngai thei tawh lo a, "4-4-2," tih leh, "Attack, attack, attack," tiin LVG hi an au khum a, 3-5-2 formation hmanga Southampton an hneh loh leh QPR laka an talbuai chu an dem a ni.

Liverpool-in ngai an awm?

December-a Manchester United an hneh loh hnuah Liverpool an insiam ṭha a, vawi li khelhah vawi hnih an chak a, vawi hnih an draw - Inrinnia Villa Park-a an chak hnuah Liverpool manager Brendan Rodgers chuan ngai an awh leh ṭan tawh thu a sawi.

Season hmasaa pahnihna Liverpool hi December-ah mai khan Champions League khel phak team aia point sarih zeta an hniam avangin season thara Champions League khel phak lo tur ang hiala ngaih an ni hman a, tunah erawh hma an sawn chak hle. Inrinni inkhelah Borini chuan Jordan Henderson-a ball pek duhthusam chu minute 24-naah a khung a, hemi hnu hian Villa hi an hlauhawm zawk mah a, a bikin second half ṭan hnuah gopal an thun teuh hle.

Liverpool an buai meklaiin lut thar Lambert chuan minute 79-naah goal a thun a, Liverpool-in point thum an hmu. Villa manager Paul Lambert erawh a dinhmun a derthawng ta hle a, tun hnaiah game nga chhung goal an thun tawh lo a, an chak theih loh avangin Villa fans lamin bang turin an nawr ṭan ta.

Rodgers chuan, "Hmalam kan pan zel a, he team naupang tak hi a insiam ṭha zel a ni. January thla tawp thlenga hetianga kan kal a nih chuan a sang pali zinga tel hi kan la tum ruh hle a ni," tiin a sawi.