Koeman-a'n Southampton a chhuang
Season hmasaa team che ṭha tak kha a enkawl tawh lo a, Southamptonn team 'thar' a enkawl a, Premier League-a an chet ṭhat avangin Ronaldo Koeman chuan a team-te a chhuang hle.
Southampton hi Premier League-ah pathumna an ni mek a, he team hi season ṭan dawna mi tam takin a mawng lama talbuai tura an rin a ni. Season hmasa khan Southampton hi an che ṭha ngei mai a, 'star players' pawh an kawl nual a; nimahsela tunah chuan heng player 'langsarte' hi Premier League club lian leh hausa zawkin an inchuh zo tawh.
Season hmasa chuan Adam Lallana, Luke Shaw, Dejan Lovren, Rickie Lambert leh Calum Chambers-te an nei a, hengte hi pawisa ngah tak takte an duh avangin an leisak vek. Manager thar Koeman a luh hian Southampton-a player
'ṭha' nia sawite an chhuak zo tawh - tunah erawh an chhuahna club-te aia sangah he Southampton club ngei hi Koeman chuan a vawrh sang ta.
Koeman chuan, "Tunah zet chuan kan khel ṭha a, kan boruak a ṭha a, player-te an thawkrimin an inpe bawk a, pathumna nih hi kan phû tiin kan sawi ngam tawh ang," a ti a; Koeman hian season ṭan hma khan tuna an dinhmunah hian an awm ang tih hrilh se amah ngei pawhin a awih loh tur thu a sawi.
Koeman chuan Manchester United an hneh hnua Newcastle United khelmuala an chak thei chu, "Ka lawm takzet a ni. Mi zawng zawngin Man United khelmuala kan chak kha an sawi uar a, kha kha a lawmawm tehmeuh mai a, kei erawh chuan Newcastle kan hneh dan hi ka la dah sang zawk a, a chhan chu kar khatah game thum kan khel a, inhliam vangin player kan chang nual a, chuti chunga kan chak hi ka dah sang hle a ni," a ti.
Koeman faktu Elia
Southampton-in Newcastle United 2-1 in an hneh a, heng goal pahnihte hi an player thar Eljero Elia thun a ni. Werder Bremen aṭanga loan-a an hawh player hi Germany leh Italy-a tun hnaia hlawhtling lo taka khel a ni a, Koeman-a'n amah a ring tawk leh a khelhtir duh chu Elia hian lawmawm a ti hle.
Elia chuan, "Ka teammate, kan coach leh kan chairman-te chungah ka lawm a, min ringtawk hi ka lawm a ni. Kan coach hi min ringtu ka neih chhun a ni," a ti.
Dutch international hi player talent nei ṭha tak ni mah se a khelh ṭhat leh khelh chhiat a inthlau em em a, a nungchang a ṭhat loh tel bawk avangin player enkawl harsa tak niin an sawi ṭhin.