Vawiinah MPL Under 17 semi final
Mizorama rawlthar football thiamte fuan khawmna, Mizoram Premier League Under 17 semi final chu vawiin hian Lammualah khelh a ni dawn.
Dar 11:00-ah Chanmari FC leh Dinthar FC an inkhel ang a, semi final hnuhnung zawkah Aizawl FC leh Mizoram Police chu dar 2:00-ah an inkhel ve thung ang.
Group B a fel ta
Inrinni khan Group B chinfel ni. Semi final khel tur an hre tawh a, group hmahruaitu zawnna mai a ni. Aizawl FC-in 2-0 in Dinthar FC an hneh a, group hmahruaitu an ni. Bethlehem Vengthlang FC-in 2-0 in Reitlang FC an hneh a, anni pahnih hi chu semi final thleng zo ta lo ve ve an ni.
Aizawl FC leh Dinthar FC inkhelah hian Rochharzela chuan minute 13-naah Aizawl FC tan goal pawimawh tak mai a thun a, minute 51-naah Stephen Lalnunmawia chuan penalty aṭangin an goal hnihna a thun a, 100% record nen Grpup B an chhuahsan ta.
Bethlehem Vengthlangin Reitlang an hneh ṭum hian Hmingthanmawia leh Hmingchungnunga-te'n first half-ah goal an thun a, point thum nen MPL Under 17 an khelh hmasak ber chu an zo ta.
Group A & B thlirna
Group A-ah Lunglei FC an inlan lo a, team pathum chiah an awm. Chanmari FC an ṭha fâl hle a, anni hian game hnihah an khingpui an hneh ve ve a, an goal difference pawh 8 a tling hial a, point ruk an hmu. Pahnihna leh semi final lut ve tho Mizoram Police hian Chanmari FC si khatin an hneh lo a, anni hnuaiah hian point hmu ve ta lo Chanmari West FC an awm.
Team P W D L GF GA GD Pts
Chanmari FC 2 2 0 0 10 2 8 6
Mizoram Police FC 2 1 0 1 5 3 2 3
Chanmari West FC 2 0 0 2 0 10 -10 0
Group B-ah Aizawl FC an che ṭha takzet a, vawi thum inkhelin an chak vek a, an goal difference pawh 8 a tling a, point kua an hmu. Anni hnaih bertu Dinthar FC hian point ruk an hmu a, anni pawh hi team chhe lo tak an ni.
Team P W D L GF GA GD Pts
Aizawl FC 3 3 0 0 10 2 8 9
Dinthar FC 3 2 0 1 9 4 5 6
Bethlehem VT FC 3 1 0 2 5 9 -4 3
Reitlang FC 3 0 0 3 1 10 -9 0
Chanmari - Dinthar!
Mizoram football-ah tun hmain 'rivalry' hmuhnawm leh chanchin ngaihnawm a awm ṭhin a, '1st MAP vs PWD' tihte chu 1980's-a Mizo mipui ko khawmtu a ni a, Power Dept leh PHE football team vanglaite pawh a awm - tun hnaia Mizorama football rivalry lian tak chu Chanmari FC Vs Dinthar FC a ni - vawiinah Under 17-ah an inhmachhawn dawn.
Dar 11:00-a inkhel turah hian Chanmari FC hi an kal dan en chuan rinkai zawk an nih hmel a, anni hian an khingpui an hneh fai vek. Hei mai hi a ni lo, Chanmari FC hi MPL Under 17 neih tawha la champion ve ve an ni. Dinthar FC hi an chhe lo tih Bethlehem Vengthlang leh Reitlang FC lamin an hre tawh ang a; match thuma goal kaw (9) thun thei team hi an ṭha tawk tih a hriat theih.
MPL lamah an senior team-te hmuhnawm takin an lo inkhel fo tawh a, vawiinah Under 17 lam an inkhel ve thung dawn a ni.
Aizawl FC - Police
Aizawl FC hi MPL 1 leh MPL 2-a champion thei mai tura rinkai an ni a, kum tluana regular taka inzir an ni a; nimahsela an vanduai ve ve. Tun season MPL-ah an senior team an champion a, chuvangin MPL U 17 lamah pawh champion an tum ruh a, an ṭang hle a ni - anni hi khelh thuma chak vek thei, goal 10 khung thei team an ni.
An khingpui tur Mizoram Police FC hi 1st MAP Football Academy naupangte an ni hlawm. Anni hian footballer ṭha ṭha an la khawm lem lo a, a lo kal apiang football an zirtir thung a, Mizorama footballer ṭha ṭhahnem tak hi an zirtir chhuah an ni.
Group A-ah Chanmari FC an hneh lo a, semi final an lut phak tho a, semi final-a Aizawl FC an tum tur hi an huphurh bik hauh lo ang.