Jose Mourinho 'duhthusam' inkhelah Chelsea Chak Chiang
Jose Mourinho chuan, "Inkhel duhthusam a ni e," a ti a, Garry Monk chuan, "A chhe takzet," a ti a, an sawi dik ve ve!
Inrinnia Liberty Stadium-a inkhelah mikhual Chelsea chuan Swansea 5-0 in an sawp a, Mourinho team tan Diego Costa leh Oscar-te chuan first half-ah goal hnih ve ve an thun a, second half-ah lut thar Andre Schurrle chuan Chelsea goal ngana a thun a, Monk-a enkawl Swansea hi an talbuai tluan chhuak a ni.
Chelsea-in point ngain hma an hruai ta a, point 52 hmuin Pathiannia inkhel tur Manchester City chuan point 47 an hmu a; Swansea hi Premier League-a an kai hnua an khelmuala anc hak loh nasat ber ṭum a ni.
Chelsea 'show' a ni e
Chelsea hian goal li an thun a ni mai lo a, goal li ṭha tak tak first half-ah an thun thei. Ball an inpe kual a hmuhnawm a, an inthlawp ṭhat bakah an khingpuite ball inpe tur an dang chat zung zung a, champion rim an nam leh ṭan ta.
Goal hmasa ber hi minute khatna leka lut a ni a, Swansea player Gylfi Sigurdsson tihsual nangchingin second 50-naah Oscar chuan goal a khung. Minute 20-na a ni a, Chelsea-in ball an inpek kual nek hnuah Costa chuan goal ṭha tak mai a thun a, Swansea an hawi buai hle.
Minute 34-na a ni a, goal a lut leh a, Costa thun bawk a ni - he goal hi Swansea defender Federico Fernandez tihsual vanga Costa thun a ni a, September-a Stamford Bridge-a Swansea goal-a vawi thum thuntu Spanish striker hian Swansea hi vawi hnih hmachhawnin an goal-ah vawi nga a khung der mai!
Swansea buaina belhchhah turin Oscar bawk a lo lang a, minute 36-naah a thun a, half time-ah 4-0 a ni. Second half-ah Swansea lamin thun vena tur remchang an hmu mang lo a, Chelsea tan Oscar chuan hattrick siam theihna hun ṭha a bawlh pelh a; nimahsela lut thar Schurrle chuan minute 79-naah Branislav Ivanovic-a ball pek a khung a, 5-0 a ni.
Chelsea an kal zel a, Swansea erawh ruaiṭheh nia (December 26) Aston Villa an hneh hnuah tumah an la hneh leh lo.
Champion rimnam
Chelsea hi Krismas boruakah an che ṭha lo. An hnuaia awm Manchester City-in an rawn nih rual hman hial. An player ngai an chhawr rim si a, beisei anga an khelh loh ṭumin a thlaktu khel khât tak takte'n an thlak zo ṭhin lo a, Chelsea leh Mourinho ngei pawhin sawisel an kai hman.
Kum a thar a, Chelsea 'dik tak' kan hmu leh ta. Mourinho hun hmasaa 'solid defending' ringawt kha an kal pêl tawh a, khatih hunlai kha chuan result nei ṭha mah se 'boring Chelsea' tia sawisel an ni tel ṭhin. Tunah erawh 'beautiful football' an khel a, an Brazilian pahnih (Costa chhiar telin!) ball inpe vel hi Premier League-a a hmuhnawm ber pawl a tling a, Arsenal leh Barcelona game timawitu ni phak ṭhin Cesc Fabregas an kawl tel bawk si a, Chelsea aia ball inpe hmuhnawm zawk hi an awm a nih pawhin an tam tawh hauh lo ang.
Tlar hnung chu Mourinho naute an nih avangin a la phui ṭha zel bawk si a, he Chelsea team hi Mourinho hnuaia Chelsea team hmuhnawm ber an ni ngei ang - champion erawh sawi a la hun lo a, a la hma deuh a; nimahsela champion rim an nam ṭan chiang mai.
Inkhel duhthusam
Mourinho chuan Swansea an hneh ṭuma a naute khelh dan chu 'duhthusam' a ti tawp mai a; nimahsela inkhel mawi tak piah lamah 'champion nomawi' neih ngei a duh tlat.
Chelsea boss chuan, "Inkhel duhthusam a ni e, engkim mai kha kan ṭhatna tur vekin a kal; nimahsela champion nomawi a tel loh chuan hriatreng kan ni dawn lo. Eng ang pawhin khel mawi mah ila miin an hriatreng tur chu kan champion nomawi chiah a ni," a ti a, a tumah a chiang ngei mai.
Chelsea boss chuan a team chu chhuanawm a tiin an hmabak a êng hle tih a sawi a, "Team naupang tak, hun rei tak chhung la khelho thei tur team an ni a; nimahsela tun season-ah ngei hian championa hming chher kan tum a ni," tiin a sawi.
Chelsea el phak tura rinkai chu Manchester City chiah an ni a, tun hnaia Man City lamin an umphak thuak thuak chu Mourinho chuan an buai phah loh thu sawiin, "Pressure a awm ka hre lo a, player-te ngaihdan pawh ka hre lo a; amaherawhchu an hriat chian chu mawhphurhna an nei a, chu chu chak zel hi a ni a, hei hi an tih tur chu a ni," a ti.