Ngopa Open-ah Aizawl tlangval a champion

Mizoram tennis hi Ngopa lamin an awp a ni ber a; nimahsela Inrinnia khelh zawh tak Ngopa Open Tennis Championship mens singles-ah Innocent Lalrindika (Aizawl Tennis Club) a champion a, a dang zawngah chuan Ngopa-in ro an rel.

January 14 aṭanga khelh ṭan Ngopa Open final-ah hian Mizoram number 2 Innocent Lalrindika hian Mizoram number 1 Ramengmawia (Ngopa Tennis Club) hmachhawnin 1-6, 6-1, 6-4 in a hneh. He inkhel hi entu an ṭhahnemin boruak pawh a sang viau a, set khatna a hloh hnuah mikhual tlangval hi a champion ta a ni. Women's singles final-ah Ngopa Tennis Club ve ve Zothanpari leh MS Dawngkimi an intum a, Zothanpari a chak. Men's doubles final-ah Calvin Lalremsiama leh Ramengmawia inkawpin Innocent Lalrindika leh Lalhmachhuana an hneh a; Ramengmawia leh Innocent-a hian trophy pahnih an dawng ve ve a ni.

Ngopa hi tennis thiam khua an ni a, hun rei tak chhung chu Mizorama tennis player ṭha thawh hnem ber an ni a; Ngopa Open Tennis Championship-ah hian Mizoram hmun hrang hrang aṭangin tennis players ṭhahnem tak an tel a ni.

Ngopa Open results
Men's singles - Innocent Lalrindika (ATC) def. Ramengmawia (NTC)
Men's doubles - Calvin Lalremsiama & Ramengmawia def.
Innocent Lalrindika & Lalhmachhuana
Women's singles - Zothanpari (NTC) def. MS Dawngkimi (NTC)
Seniors Singles - H Zoramhruaia (NTC) def. Major-a (Khawzawl)
Boys U-12 - Vanlallawma (NTC) def. Malsawmtluanga (NTC)
Boys U-14 - Lalchhanchhuaha (NTC) def. Lalmuansanga (NTC)
Boys U-18 - Lalrinfela (NTC) def. Hmingthansanga (NTC)