Arsenal-ah defender thar

Arsenal manager Arsene Wenger chuan January-ah defender thar lei an tum thu a sawi - Arsenal hi an defender an inhliam nasat avangin an buai hle a ni.

Wenger chuan, "Defender inhliam nei leh ta ila a hlauhthawnawm tawh a, tunah hi chuan a buaithlak khawp mai," a ti a, defender thar lei an tum thu a sawi. Hetihlai hian Wenger chuan player lei tur an vang tih a sawi a, "Season laihawlah tuin nge central defender neih ṭhatte hralh phal ang?" a ti.

Arsenal hian West Ham defender Winston Reid leh Borussia Dortmund defender Mats Hummels-te chu January-ah hian lei tumin an dawr dawn niin an sawi a, harsatna an tawh thu a sawi tel. Arsenal boss chuan, "Europe-a team ṭha 10 zinga mi tichak lehzual tur defender hi an tam lo a, chutiang mi chu lei kan duh si a, an vâng khawp mai, kan zawng zel a ni," a ti.

Tunah hian Arsenal defender Laurent Koscielny, Kieran Gibbs, Nacho Monreal leh Mathieu Debuchy-te an inhliam mek a ni.