Heavy weight boxing Champion thar Wilder

Boxing khawvela hneh loh la tawng lo Deontay Wilder (29) chuan Inrinni khan Bermane Stiverne (36) chu uninomous decision-a hnehin, WBC heavyweight title a chhuhsak.

Deontay Wilder hian WBC champion lai Bermane Stiverne hi a ngam hle a, kawng engkimah a hneh zawk a, judge pathumte pawhin chak zawkah an puang vek a ni.

Wilder hian professional a luh chilh hnuah mi 33 hmachhawn tawhin, a la hneh vek a, Bermane Stiverne tih loh hi chu knock out vekin a hneh!

American zingah kum 2006 hnu lamah heavy weight champion pakhatmah an awm tawh lo a, Deontay Wilder hi a rawn champion leh a ni.

WBC champion thar chuan, "Zanin khan zawhna tam tak chu ka chhang a ni. Round 12 chhung ṭha takin ka khel thei tih hi ka hre reng a, chu chu zanin khan ka rawn lantir a, ka hlim tak zet e," a ti.

Mi 32 knockout tawh Deontay Wilder chuan Bermane Stiverne pawh hi knockout leh ngei a inrin thu a sawi a, "Round 4 thleng bak khelh a ngaih ka ring lo. Mahse, ṭha tak takin min rawn hnek theih reng avangin tihngaihna a awm lo," a ti. WBC title humhim zo ta lo Canadian boxer Bermane Stiverne chuan a chak loh hi pawmin, "Keimah ka ni ta lo hialin ka inhria," tiin, a khelh chhiat thu a sawi.

Feet 6 leh inches 7 zeta sang American boxer hi judge pathumte chuan chak zawkah an puang vek a, 118-109, 119-108 leh 120-107 in a sang zawk. He inhnek hi kum 18 kal taa Mike Tyson-a'n Evander Holyfield-a beng a seh hnua MGM Grand-a heavy weight title fight an nghah leh hmasak ber a ni a, entu zingah hian Tyson leh Holyfield pawh an tel a, tun hmaa champion hlui Larry Holmes pawhin a hmunah a en.

Boxing lawm hnam leh boxer nei ṭha ṭhin America mipuite chuan heavy weight champion thar an nei leh ta a; hetihlai hian heavy weight title dang WBA, IBF leh WBO te chu Ukranian booxer Wladimir Klitschko kutah a la awm a ni.