Di Maria match hnuhnung

Angel Di Maria chuan Copa America 2024 final hi Argentina tana a match hnuhnung ber a nih tur thu a sawi a, an ram jersey ha chunga khelmual a luh hnuhnung ber chu a thleng dawn ta a ni.

Kum 36 mi Di Maria chuan, "Argentina tana match hnuhnung ber khel tur hian ka la inpeih lo, mahse chu hun chu a lo thleng dawn ta a ni. Final kan khelh turah hian eng pawh thleng ni se la, ram tana ka theihtawp lo chhuah tawhna avangtein inchhuang takin ka kal liam thei ang.

"Kan ram tan hian thi leh thau pawlhin ka lo bei tawh ṭhin, a chang chuan hreh tak chunga thutlukna kan siam a ngaih changte hi a awm ve thei a ni, tun hun ka thlen theih nana min pui tute zawng zawng chungah ka lawm," a ti.

Di Maria hi Argentina hlawhtlin theih nana player pawimawh berte zinga mi a ni. Copa America 2021 an champion ṭum khan, final-ah Brazil 1-0 in an hneh, goal awmchhun hi a khung a ni hial.

Qatar World Cup final-a France an hneh ṭum pawhin goal a khung a, Copa America champion leh Euro champion ten an khelh Finalissima-ah khan Italy lakah goal a khung bawk, ram tan a sulhnu hi engti kawng zawng maha sawi nep theih a ni lo.