Copa America 2024 Final : Messi-a Argentina hmaah Rodriguez-a Colombia

Lionel Messi leh Argentina ropuina chu belhchhah mai theih dinhmunah an ding mek - Copa America 2024 nomawi chu Colombia nen an inchuh dawn, inkhel hmuhnawm bik an chhawp chhuak leh ngei ang.

India aṭang chuan TV-ah live a ni dawn lo a, mahse Online kaltlanga en theih a ni - Mizoram aṭang pawhin FanCode hmanga en theih a ni dawn. Thawhṭanni zing dar 5:30 a nih dawn avangin thawh hma erawh a ngai dawn hle a ni.

Messi awmna

Football player piang tawh zinga hlawhtling bera ngaih Lionel Messi pawhin a hun hnuhnung lam a hmang mek a, Copa America bik phei chu a khelh hnuhnung ber a ni dawn, nomawi nei ngeia a tawpna khar a duh dawn tih a chiang.

Argentina hi rinkai zawk ni mah se thil a awlsam dawn lo. Messi chuan, "Uruguay leh Colombia inkhel kha kan en a, team ṭha tak ve ve an ni. A tu zawk zawk pawh kha tlang ni se a awlsam dawn lo tih chu a chiang sa.

"Colombia hi hun rei tak chhung tlawm loa kaltluang tawh an ni a, player an nei ṭha hle. A bik takin an tlarhma lam an che rangin an hriam hle, final a nih tawh bawk avangin engkim huamin an rawn khel dawn, kan fimkhur a ngai dawn hle a ni," a ti.

Tun hmain Messi leh Argentina hi final-ah an lo vanduai fo tawh. Copa America mai bakah FIFA World Cup final thlengin a chak lo zawkah an ṭang tawh, tunah hnaiah erawh inelna lian pahnihah hian a zawnin a champion a, major title pathum la zawn thei dinhmunah an ding.

Kum 37 mi Messi chuan, "Final boruak hi chu engtik lai pawhin a danglam ṭhin, chutihrualin tun hnaiah ṭha takin kan khel ṭhin thung. Kan hmaah thil thleng lo hmachhawn dan hi kan thiam tawh em em a, tun ṭumah pawh hian naumti taka khelh kan tum ang," a ti.

James hoin

Copa America tournament vawi khata assist nei tam ber chu Messi a ni ṭhin, mahse he record dinglai hi James Rodriguez-a'n a rawn khum tawh, tun Copa neih laiah a ṭhiante goal khung tur vawi ruk a siamsak tawh - Argentina tan James hi ven ngun ngai tur a ni ang.

Real Madrid midfielder hlui hian hmun awl a hmu thiam em em a, freekick leh corner chhuih thiam bik a ni bawk. Coach Nestor Lorenzo pawhin a hmanraw hlauhawm ber hi a hrechiang, a hmun pawimawh a chantir leh ngei dawn a ni.

Colombia hian rinkai Uruguay chu player pakhata kim lo chungin an hneh thei, hei vang hian inrintawkna an nei sang dawn hle a ni. James chuan, "Copa America final hi kum 13 chhung deuhthaw kan nghak tawh, tunah chuan kan nghak chhuak ve ta.

"Hei leh chen hi tluang takin kan kal tawh a, thawhhona ṭha tak avangin tun dinhmun hi kan thleng a ni a, a ṭha thei ang bera a hmawr bawk ngei kan duh dawn a ni," tiin a sawi a, champion lai lak aṭanga nomawi chhuhsak ngei an tum.

Colombia forward Luis Diaz pawhin Argentina leh Messi chu duhsak viau mah se Copa America nomawi chu chawi ngei an duh tih a sawi a, hnehna hlado chham chung ngeiin an rama haw a duh a ni, champion turin thapui an thawh ang.

Record thar?

Copa America champion hnem ber chu Argentina an ni a, nomawi vawi 15 an chawi tawh - La Albiceleste hi anmahni chauh an ni lo thung, champion tam lamah Uruguay nen an intluk tawk mek.

Lionel Scaloni naute hian an tlukpui Uruguay kalsan theihna remchang an nei dawn, record thar siam turin vawi khat chak an la hmabak tihna a ni a, an khingpui tur hi Colombia an nih avangin thil awlsam tak erawh a ni dawn lo.

Nestor Lorenzo enkawl Colombia hi match 28 chhung tlawm loa kaltluang mek an ni a, team thawhhona ṭha a nih rualin player malkhai pawhin an nei ṭha tawk viau a, chuvangin Argentina laka chak turin an hriam ve tawk.

James leh Luis Diaz te hian striker chak leh tawnhriat nei ṭha Jhon Cordoba an chawm thin, an tlarhnung a phui ṭhat bakah goal khung nuam an tih ṭhin em avangin final-ah pawh hian goal chu an khung leh a rinawm, a hnung lam nghet thlang tur erawh chuan hna a hautak ve hle ang.