Mumang ramah Jasmine Paolini - A hmabak chu Krejcikova

Wimbledon hmeichhe singles champion thar kan hmu dawn - Pathianni zan dar 6:30 hian final khelh tur niin, la champion ngai lo Jasmine Paolini leh Barbora Krejcikova te an inhmachhawn ang.

Ningani zan khan semifinal khelh niin, inkhel hmuhnawmah seeded pasarihna Paolini hian Donna Vekic chu 2-6, 6-4, 7-6 (10-8) in a hneh a, darkar hnih leh minute 51 an khelh hi Wimbledon hmeichhe semifinal rei ber a ni hial.

Tun hma kha chuan Paolini hian Wimbledon match a khelhah chak ni hmel a la hmu ngai lo - mahse tunah chuan a zawnin match ruk a chak ta a, mumang ramah chengin a mumang aṭanga harh chhuah a duh rih lo ang.

Italian nula Paolini chuan, "Ka service a ṭha tawk lo hle, chuvangin kan tan inkhelh a harsat phah. Vawi leh khatah chak tlang nghal pawp theih a ni lo a, point khat te te ka hmuh belhkhawm chu chak nan a tawk," a ti.

Chak lo zawk Vekic chuan mittui nen tennis court a chhuahsan, a ban dinglam hliam vangin a ṭhat dan berin a khel chhuak thei lo a, theihtawp chhuahin bei let ṭhin mah se a tawpah a vanduai zawkah a ṭang.

Semifinal inkhel lehlamah Barbora Krejcikova chuan set hloh hmasa mah se a tho chhuak, a khingpui 2022 Wimbledon champion Elena Rybakina chu 3-6, 6-3, 6-4 in a hneh a, dai ngai loh ram a dai lut.

Czech Republic nula Krejcikova chuan, "Wimbledon singles final ka khel ang tih hi ka suangtuah phak ngai lo, he dinhmun thleng tura ka beihna zawng zawnte ka ngaihtuah hian ka hlim hle a ni, coach ṭha tak ka neih chu a ṭangkaina kan hmu," a ti.

Krejcikova hian coach atan Jana Novotna a ruai a, ani hi Wimbledon 1998 champion tawh kha a ni a, a hnen aṭangin grass court inelna lian boruak leh thil kalhmang tam tak a zir chhuak, tunah chuan final hial a lut ta a ni.